ທ່ານຮອງນາຍົກເຂົ້າຮ່ວມກອງປະຊຸມສຸດຍອດ ເວທີປຶກສາການຮ່ວມມືແຫ່ງອາຊີຄັ້ງປະຖົມມະລຶກ

(ຂປລ) ໂດຍຕອບສະໜອງຕາມການເຊື້ອເຊີນຂອງສົມເດັດ IA-Ahmed AI-Jaber AI-Sabah ເຈົ້າຊີວິດ ແຫ່ງກູເວດ, ຄະນະຜູ້ແທນ ແຫ່ງ ສປປ ລາວ ນຳໂດຍພະນະ ທ່ານ ສົມສະຫວາດ ເລັ່ງສະຫວາດ, ຮອງນາຍົກລັດຖະມົນຕີ ແຫ່ງ ສປປ ລາວ, ຕາງໜ້າໃຫ້ພະນະທ່ານ ຈູມມາລີ ໄຊຍະສອນ, ປະທານປະເທດແຫ່ງ ສປປ ລາວ, ພ້ອມຄະນະ ໄດ້ອອກເດີນທາງເພື່ອເຂົ້າຮ່ວມ ກອງປະຊຸມສຸດຍອດເວທີປຶກສາສົນທະນາການຮ່ວມມືອາຊີຄັ້ງປະຖົມມະລຶກ ( 1 Asia Coopertion Dialogue (ACD) Summit ທີ່ກູ ເວດ ໃນລະຫວ່າງວັນທີ 15-17 ຕຸລາ 2012.

ຂອບການຮ່ວມມື ACD ແມ່ນເວທີປຶກສາສົນທະນາ ຊຶ່ງສ້າງຕັ້ງຂື້ນໃນປີ2002, ໂດຍມີກອງປະຊຸມປະຈຳປີຂອງລັດຖະມົນຕີຕ່າງປະເທດ ເປັນກົນໄກສູງສຸດໃນໄລຍະຜ່ານມາ. ປະຈຸບັນມີສະມາຊິກທັງໝົດ 31 ປະເທດ ແລະ ຍັງມີແນວໂນ້ມທີ່ຈະຫຍາຍອອກໄປອິກ. ຂະແໜງຂອງການຮ່ວມມືເອຊີດີໃນປະຈຸບັນຈະເນັ້ນໃສ່ການຮ່ວມມືດ້ານເສດຖະກິດ ເປັນສ່ວນໃຫຍ່ໂດຍມີ 20 ຂະແໜງການຮ່ວມມືກັນຄື: ພະລັງງານ, ການທ່ອງທ່ຽວ, ເຕັກໂນໂລຊີຂໍ້ມູນຂ່າວສານ, ການເງິນ, ສິ່ງແວດລ້ອມ, ການສຶກສາ, ຊັບພະຍາກອນມະນຸດ, ການຮ່ວມມືດ້ານວິສາຫະກິດຂະໜາດນ້ອຍ ແລະ ຂະໜາດກາງ, ຄວາມປອດໄພຕາມທ້ອງຖະໜົນ, ການກະສິກຳ, ສະຖາບັນມາດຕະຖານຂອງອາຊຽນ, ໄພພິບັດທາງທຳມະ ຊາດ, ການສຶກສາຜ່ານລະບົບ, ການຂົນສົ່ງ, ກອງທຶນພື້ນຖານໂຄງລ່າງ, ການຕ້ານການອຶດຫິວ, ເຕັກໂນໂລຊີຊີວະພາບ, ການຄ້າຜ່ານ ລະບົບເອເລັກໂຕຣນິກ, ວິທະຍາສາດ-ເຕັກໂນ ໂລຊີ ແລະ ການສ້າງຄວາມເຂັ້ນແຂງທາງ ດ້ານກົດໝາຍ.

ກອງປະຊຸມສຸດຍອດເອຊີດີຄັ້ງປະຖົມມະລຶກນີ້ເປັນບາດລ້ຽວໃໝ່ ຂອງຂອບການຮ່ວມມືເອຊີດີທີ່ໄດ້ຍົກລະດັບກົນໄກການຮ່ວມມືຂື້ນມາເປັນຂັ້ນສຸດຍອດ ພາຍຫລັງ 10 ປີທີ່ ສ້າງຕັ້ງຂື້ນມາ. ກອງປະຊຸມຈະດຳເນີນໄປເປັນເວລາ 2 ວັນ ໂດຍມີກອງປະຊຸມເຈົ້າໜ້າທີອາວຸໂສ ແລະ ກອງປະຊຸມລັດຖະມົນຕີ, ມີການກະກຽມກ່ອນ 2 ວັນ. ກອງປະຊຸມ ຈະ ໄດ້ທົບທວນຄືນຜົນການຈັດຕັ້ງປະຕິບັດກິດຈະກຳ ແລະ ໂຄງການຮ່ວມມືເອຊີດີ ໃນໜື່ງທົດສະວັດຜ່ານມາ ແລະ ປືກສາຫາລືທາງການຮ່ວມມືໃນອະນາຄົດ. ກອງປະຊຸມຈະຮັບ ຮອງເອົາເອກະສານສຳຄັນຄື: ຄຳຖະແຫລງຂອງກອງປະຊຸມສຸດຍອດຄັ້ງທຳອິດ, ເຊິ່ງຈະເນັ້ນໜັກຊຸກຍູ້ໃຫ້ສະມາຊິກຈັດຕັ້ງຜັນຂະຫຍາຍ 20 ຂະແໜງການຮ່ວມມືໃຫ້ເປັນ ຮູບປະທຳຂື້ນເລື້ອຍໆເພື່ອກ້າວເຂົ້າສູ່ທົດສະວັດທີ 2 ຂອງການຮ່ວມມືດ້ວຍຄວາມໜັກແໜ້ນກວ່າເກົ່າລວມທັງການຊຸກຍູ້ ໃຫ້ມິການແລກປ່ຽນຖອດຖອນບົດຮຽນນຳກັນ, ຖ່າຍ ທອດເຕັກໂນໂລຊີ, ສົ່ງເສີມການຄ້າ ແລະ ການລົງທຶນ ເພື່ອເສີມສ້າງສາຍພົວພັນຮ່ວມມືກັນຂອງອາຊີໃຫ້ແໜ້ນແຟ້ນ ແລະ ພັດທະນາເສດຖະກິດ ໃຫ້ມິການຂະຫຍາຍຕົວ ຂື້ນເລື້ອຍໆ.

ໃນໂອກາດເຂົ້າຮ່ວມກອງປະຊຸມສຸດຍອດເອຊີດີ ທີ່ກູເວດຄັ້ງນີ້, ພະນະທ່ານຮອງນາຍົກ ສົມສະຫວາດ ເລັ່ງສະຫວັດ ຍັງຈະໄດ້ພົບສອງຝ່າຍກັບຄູ່ຮ່ວມຕຳແໜ່ງ, ພະນະທ່ານຮອງ ນາຍົກລັດຖະມົນຕີ ແຫ່ງລັດກູເວດ, ເພື່ອຮ່ວມກັນທົບທວນ, ຕີລາຄາ ແລະ ວາງທິດທາງ ສຳລັບການພົວພັນຮ່ວມມືສອງຝ່າຍໃນໄລຍະຜ່ານມາ ແລະ ອະນາຄົດ ພ້ອມທັງປຶກ ສາຫາລືກັນ ກ່ຽວກັບບັນຫາອື່ນໆທີ່ທັງສອງຝ່າຍມີຄວາມສົນໃຈ. ນອກຈາກນັ້ນ; ຍັງຈະໄດ້ເຂົ້າຢ້ຽມຂ່ຳນັບການນຳກູເວດ ແລະ ພົບປະກັບ ປະທານການຄ້າ ແລະ ອຸດສາຫະກຳ ກູເວດ, ຫົວໜ້າກອງທຶນກູເວດເພື່ອພັດທະນາເສດຖະກິດແລະຈະຢ້ຽມຢາມສະຖານທີ່ຂຸດເຈາະນ້ຳມັນ ອັນມີຊື່ສຽງຂອງກູເວດອີກດ້ວຍ.

ພິທີສົ່ງພະນະທ່ານ ຮອງນາຍົກ ສົມສະຫວາດ ເລັ່ງສະຫວັດ ແລະ ຄະນະ ທາງການໄດ້ຈັດຂື້ນທີ່ສະໜາມບິນສາກົນວັດໄຕໃນເຊົ້າວັນທີ15ຕຸລາ2012 ໂດຍມີຄະນະທາງການ ຝ່າຍລາວ, ຄະນະພົວພັນຕ່າງປະເທດຫ້ອງວ່າການ ປະທານປະເທດ ແລະ ອຸປະທູດ ກູເວດປະຈຳ ສປປ ລາວອອກສົ່ງ.


ຂໍຂອບໃຈຂ່າວຈາກ http://www.kpl.net.la