ລັດຖະບານ ສປ ຈີນ ມອບເຄື່ອງຊ່ວຍເຫລືອ ແກ່ ສປປ ລາວ

(ຂປລ): ທ່ານ ດຣ. ສິນລະວົງ ຄຸດໄພທູນ, ລັດຖະມົນຕີ, ຫົວໜ້າຫ້ອງວ່າການລັດຖະບານ ໄດ້ເປັນກຽດຮັບລົດເມ ວີໄອພີ (VIP) ຈຳນວນ 10 ຄັນ, ລົດເກງ 4 ຄັນ ແລະ ອຸປະກອນເອເລັກໂຕຣນິກ 39 ເຄື່ອງ ລວມມູນຄ່າ 19,3 ຕື້ ກວ່າກີບ ຈາກທ່ານ ນາງ ປູ ຈຽນ ກົວ, ເອກອັກຄະລັດຖະທູດ ສປ ຈີນ ປະຈຳ ສປປ ລາວ ເພື່ອປະກອບສ່ວນຮັບ ໃຊ້ກອງປະຊຸມ ອາເຊັມ ຄັ້ງທີ 9 (ASEM-9) ທີ່ ສປປ ລາວ ໄດ້ຮັບກຽດເປັນເຈົ້າພາບ ແລະ ຂະຈັດຂຶ້ນໃນເດືອນພະຈິກ ທີ່ຈະມາເຖິງນີ້.

ພິທີມອບ-ຮັບເຄື່ອງຊ່ວຍເຫລືອດັ່ງກ່າວ ໄດ້ຈັດຂຶ້ນໃນວັນທີ 15 ຕຸລາ 2012 ທີ່ຫ້ອງວ່າການລັດຖະບານ ຊຶ່ງມີພະນັກງານວິຊາການທີກ່ຽວຂ້ອງ ສອງຝ່າຍ ເຂົ້າຮ່ວມເປັນສັກຂີພິ ຍານ. ໂອກາດນີ້ ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານ ໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມປິຕິຊົມຊື່ນເປັນຢ່າງຍິ່ງ ແລະ ຕີລາຄາສູງ ຕໍ່ການຊ່ວຍເຫລືອໃນຄັ້ງນີ້ ຊຶ່ງເປັນການຊ່ວຍເຫລືອດ້ານວິຊາການທີ່ສຳຄັນຍິ່ງເພື່ອຮັບໃຊ້ກອງປະຊຸມອາເຊັມ ຄັ້ງທີ 9 ໃຫ້ສະດວກວ່ອງໄວທັນການ. ພ້ອມທັງສະແດງຄວາມ ຂອບອົກຂອບໃຈ ແລະ ຮູ້ບຸນຄຸນເປັນຢ່າງສູງ ມາຍັງສະຖານທູດ ສປ ຈີນ ປະຈຳ ລາວ ກໍຄື ລັດຖະບານ ແລະ ປະຊາຊົນຈີນອ້າຍນ້ອງ ທີ່ໄດ້ໃຫ້ການຊ່ວຍເຫລືອອັນລ້ຳຄ່າ ໃນໄລ ຍະຜ່ານມາ ໂດຍສະເພາະ ໃນໂອກາດກະກຽມກອງປະຊຸມ ອາເຊັມ ຄັ້ງທີ 9 ນີ້. ຂ້າພະເຈົ້າຢືນຢັນວ່າ: ຈະນຳເຄື່ອງຊ່ວຍ ເຫລືອຈຳນວນດັ່ງກ່າວນີ້ ເຂົ້າໃນວຽກງານກອງປະຊຸມ ອາເຊັມ ໃຫ້ເກີດປະສິດທິຜົນສູງ ແລະ ສົມດັ່ງຄວາມຕັ້ງໃຈ ຂອງລັດຖະບານ ແລະ ປະຊາຊົນຈີນ ທີ່ໄດ້ໝັ້ນໝາຍເອົາໄວ້./.

ຂໍຂອບໃຈຂ່າວຈາກ http://www.kpl.net.la