ທູດສະຫະລັດ ມອບອຸປະກອນ​ເລືອ​ດປອດ​ໄພໃຫ້ແກ່ອົງການກາແດງລາວ

(ຂປລ): ສະຖານທູດສະຫະລັດອາເມລິກາ ປະຈຳລາວ ແລະ ກະຊວງປ້ອງກັນປະເທດສະຫະລັດ (DoD) ໄດ້ມອບອຸປະກອນການແພດ ແລະ ເຄື່ອງຮັບໃຊ້ຕ່າງໆ ໃຫ້ແກ່ສູນ ບໍລິຈາກເລືອດ ອົງການກາແດງລາວ ເພື່ອປັບປຸງລະບົບການເກັບຮັກສາ ແລະ ການສົ່ງເລືອດທີ່ປອດໄພ ຢູ່ບັນດາໂຮງໝໍພົນລະເຮືອນ ແລະ ໂຮງໝໍທະຫານ ໃນທົ່ວປະເທດລາວ, ມີມູນຄ່າຫລາຍກວ່າ 40.000 ໂດລາສະຫະລັດ. ການຊ່ວຍເຫລືອດັ່ງກ່າວ ເຊິ່ງແມ່ນພາກສ່ວນໜຶ່ງຂອງໂຄງການຮ່ວມມື ທີ່ກຳລັງດຳເນີນຢູ່ລະຫວ່າງ ກະຊວງປ້ອງກັນປະເທດຂອງ ສະຫະລັດ , ອົງການກາແດງລາວ ແລະ ກະຊວງສາທາລະນະສຸກລາວ.

ພິທີມອບຮັບເຄື່ອງດັ່ງກ່າວ ໄດ້ຈັດຂຶ້ນໃນວັນທີ 12 ຕຸລາ ຢູ່ທີ່ສູນບໍລິຈາກເລືອດ ຂອງອົງການກາແດງລາວ, ນະຄອນຫຼວງວຽງຈັນ, ຕາງໜ້າລັດຖະບານສະຫະລັດອາເມລິກາ ແມ່ນ ທ່ານ ນາງ ຄາເຣັນ ບີ ສຕູເວີດທ໌, ເອກອັກຄະລັດຖະທູດສະຫະລັດອາເມລິກາ ປະຈຳລາວ ແລະ ທ່ານ ພັນໂທ ແມັດທູ ເຄັນທ໌, ທູດທະຫານສະຫະລັດ ແລະ ຕາງໜ້າ ລັດຖະບານລາວແມ່ນທ່ານ ດຣ. ເຕ ທຳມະວົງ, ຮອງປະທານອົງການກາແດງລາວ ແລະ ດຣ. ດວງຈັນ ກອງຜາລີ, ຮອງຜູ້ອຳນວຍການສູນບໍລິຈາກເລືອດແຫ່ງຊາດ.

ທ່ານ ນາງ ຄາເຣັນ ສຕູເວີດທ໌ ໄດ້ກ່າວວ່າ: ການຊ່ວຍເຫລືອໝວດເລືອດທີ່ຫາຍາກ ເພື່ອສະໜັບສະໜູນການປິ່ນປົວສຸກເສີນ ໃນງານທີ່ສຳຄັນຕ່າງໆ ທີ່ຈະມາເຖິງ ເຊິ່ງລວມມີທັງ ກອງປະຊຸມອາເຊັມ 9 (ASEM 9), ເລືອດຈຳນວນໜຶ່ງທີ່ບໍ່ໄດ້ນຳໃຊ້ເຂົ້າໃນການປິ່ນປົວສຸກເສີນ ທີ່ວ່ານີ້ ກໍຈະໄດ້ຖືກນຳໃຊ້ ເພື່ອຊ່ວຍຊີວິດຂອງປະຊາຊົນລາວຕໍ່ໄປ .

ອຸປະກອນການແພດດັ່ງກ່າວນີ້ ລວມມີເຄື່ອງກວດວິເຄາະເລືອດ ທີ່ຈະຊ່ວຍໃຫ້ອົງການກາແດງລາວສາມາດກວດ ແລະ ວິເຄາະເລືອດໄດ້ 96 ຕົວຢ່າງຕໍ່ຄັ້ງ ເພື່ອຊອກຫາເຊື້ອ ເຮັສໄອວີ ເອັສ (HIV/AIDS), ພະຍາດຕັບ ແລະ ພະຍາດອື່ນໆໄດ້ໄວ ແລະ ຊັດເຈນຫຼາຍກວ່າອຸປະກອນທີ່ນຳໃຊ້ໃນປັດຈຸບັນ. ນອກຈາກນີ້ ກໍຍັງມີອຸປະກອນ ແລະ ເຄື່ອງຮັບໃຊ້ຕ່າງໆ ທີ່ຈຳເປັນສຳລັບການປະຕິບັດງານ ແລະ ການບົວລະບັດຮັກສາ ເຄື່ອງກວດເລືອດດັ່ງກ່າວນີ້ .

ຂໍຂອບໃຈຂ່າວຈາກ http://www.kpl.net.la