ເອັມ ເອັມ ຈີ ເປີດນຳໃຊ້ຫ້ອງການໃໝ່

(ຂປລ): ພິທີເປີດນຳໃຊ້ຫ້ອງການໃໝ່ ຂອງ ບໍລິສັດ MMG ລ້ານຊ້າງ ມີເນໂຣນສ໌ ລິມິເຕັດ-ບໍ່ຄຳ ເຊໂປນ ຈັດຂຶ້ນໃນຕອນແລງວັນທີ 15 ພະຈິກ 2012 ນີ້ ຢູ່ບ້ານໂພນສີນວນ ເມືອງ ສີສັດຕະນາກ ນະຄອນຫລວງວຽງຈັນ ໂດຍມີທ່ານ ແອນດຣິວ ມີແຊນມໍຣ໌, ຜູ້ບໍລິຫານງານໃຫຍ່ກຸ່ມບໍລິສັດ MMG, ທ່ານ ສົມບູນ ຣາຊະສົມບັດ, ລັດຖະມົນຕີຊ່ວຍວ່າ ການກະຊວງພະລັງງານ ແລະ ບໍ່ແຮ່, ປະທານຄະນະກຳມະການຄຸ້ມ ຄອງໂຄງການສຳຫລວດ-ຂຸດຄົ້ນ-ປຸງແຕ່ງແຮ່ຄຳ-ທອງເຊໂປນ, ມີບັນດາພະນັກງານຈາກບໍລິສັດ MMG ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ແອນດຣິວ ມີແຊນມໍຣ໌, ຜູ້ບໍລິຫານງານໃຫຍ່ກຸ່ມບໍລິສັດ MMG ໄດ້ກ່າວວ່າ: ບໍລິສັດລ້ານ ຊ້າງມີເນໂຣນສ໌ ບໍ່ຄຳເຊໂປນ ຈະດຳເນີນງານຢູ່ ສປປ ລາວ ເປັນເວລາຍາວນານ ຊຶ່ງການເປີດຫ້ອງການໃໝ່ນີ້ ສະແດງໃຫ້ເຫັນຢ່າງຈະແຈ້ງ ເຖິງຄວາມມຸ້ງໝັ້ນໃນການພັດທະນາ ໂຄງການບໍ່ແຮ່ຄຳ-ທອງເຊໂປນ ເມືອງວິລະບູລີ ແຂວງສະຫັວນນະເຂດ. ສາຍ ເຫດຂອງການຍ້າຍຫ້ອງການໃໝ່ ແມ່ນຕຶກຫ້ອງການເກົ່າທີ່ຕັ້ງຢູ່ບ້ານສີສັງວອນ ເມືອງໄຊເສດຖາ ນະຄອນຫລວງວຽງຈັນ ມີສະຖານທີ່ຄັບແຄບບໍ່ເອື້ອອຳນວຍ, ຫ້ອງການແບ່ງ ເປັນ 2 ຕຶກ ຍາກໃນການປະສານງານກັນ ຂອງພະນັກງານພາຍໃນຫ້ອງການ, ອີກຢ່າງໜຶ່ງພະນັກງານບໍລິສັດມີຈຳນວນເພີ່ມຂຶ້ນ, ສະນັ້ນ ຈຳເປັນຕ້ອງຍ້າຍຫ້ອງການ ມາຕັ້ງຢູ່ບ້ານ ໂພນສີນວນ, ເມືອງສີສັດຕະນາກ, ນະຄອນຫລວງວຽງຈັນ.

ຕາມຂ່າວຂອງບໍລິສັດ MMG ໃຫ້ຮູ້ວ່າ: ໃນໄຕມາດທີ 2 ຂອງປີ 2012 ການຜະລິດທອງ ພີ່ມຂຶ້ນ 1% ທຽບໃສ່ໄຕມາດທີ 1 ປີ 2012, ຜະລິດແຜ່ນທອງໄດ້ 21.739 ໂຕນ, ການຜະລິດຄຳຫລຸດລົງ 41% ຍ້ອນ ມີແຮ່ຈຳກັດ, ຫລອມຄຳໄດ້ 18.144 ອອນສ໌. ພ້ອມກັນນີ້ ຍັງໄດ້ເຈາະສຳຫລວດຫາແຫລ່ງແຮ່ຢູ່ 12 ແຫລ່ງ ແລະ ອື່ນໆ./.

ແກ້ໄຂລ່າສຸດ (ມື້ເສົາທີ່ 17 ພະຈິກ 2012 ເວລາ 11: 28)

 

Add comment


Security code
Refresh