ທ່ານປະທານ ຄຳໄຕ ສີພັນດອນ ໂອ້ລົມພະນັກງານການນຳຢູ່ແຂວງຊຽງຂວາງ

ນັກຂ່າວຊຽງຂວາງລາຍງານວ່າ: ໃນວັນທີ 15 ພະຈິກ 2012 ນີ້ ທ່ານປະທານ ຄຳໄຕ ສີພັນດອນ ອະດີດປະທານພັກ. ອະດີດປະທານປະເທດ ໂອ້ລົມຕໍ່ພະນັກງານການ ນຳຂັ້ນ ແຂວງຊຽງຂວາງ. ການໂອ້ລົມໄດ້ມີຂຶ້ນທີ່ຫ້ອງວ່າການປົກຄອງແຂວງ. ເຂົ້າຮ່ວມຮັບຟັງການໂອ້ລົມມີ ທ່ານ ສ.ຈ ດຣ ສົມກົດ ມັງໜໍ່ເມກ ກຳມະການສູນກາງພັກ ເລຂາພັກແຂວງ ເຈົ້າແຂວງຊຽງຂວາງ, ມີຄະນະປະຈຳພັກແຂວງ ກຳມະການພັກແຂວງ, ມີເຈົ້າເມືອງ, ຮອງເຈົ້າເມືອງ, ຫົວໜ້າພະແນກການ, ກົມກອງອ້ອມຂ້າງແຂວງ ເຂົ້າຮ່ວມຢ່າງພ້ອມພຽງ.

ໃນໂອກາດນີ້ທ່ານ ສ.ຈ ດຣ ສົມກົດ ມັງໜໍ່ເມກ ກຳມະການສູນກາງພັກເລຂາພັກແຂວງ ເຈົ້າແຂວງ ແຂວງຊຽງຂວາງ ກໍໄດ້ລາຍງານສະພາບການພົ້ນເດັ່ນໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນສົກປີຜ່ານມາ ໃຫ້ແກ່ທ່ານປະທານ ຄຳໄຕ ສີພັນດອນ ໄດ້ຮັບຊາບເຊິ່ງໄດ້ຍົກໃຫ້ເຫັນສະພາບການພັດທະນາ ໃນປະຈຸບັນຂອງແຂວງຊຽງ ຂວາງ ມີຄວາມສະຫງົບ. ມີຄວາມເປັນລະບຽບຮຽບຮ້ອຍ. ປະຊາຊົນບັນດາເຜົ່າມີຄວາມເຊື່ອໝັ້ນຕໍ່ການນຳພາຂອງພັກ. ອຸ່ນອ່ຽນທຸ່ນທ່ຽງທຳການຜະລິດ ແລະ ພັດທະນາເສດ ຖະກິດ ຄອບຄົວເຮັດໃຫ້ເສດຖະກິດຂອງແຂວງ ມີການຂະຫຍາຍຕົວຢ່າງຕໍ່ເນື່ອງເຮັດໃຫ້ຄອບຄົວທີ່ທຸກຍາກພາຍໃນແຂວງຫຼຸດລົງຈຳນວນບ້ານພັດທະນາໄດ້ເພີ່ມຂຶ້ນເປັນ 108 ບ້ານ ໃນປະຈຸບັນ. ພ້ອມນີ້ ກໍໄດ້ປະຕິບັດວຽກງານສາມສ້າງຢູ່ໃນສາມເມືອງເປົ້າໝາຍຄື: ເມືອງຄຳ, ເມືອງແປກ ແລະ ເມືອງໜອງແຮດ.

ຈາກນັ້ນ ທ່ານປະທານ ຄຳໄຕ ສີພັນດອນ ກໍໄດ້ໃຫ້ກຽດຂຶ້ນໂອ້ລົມເຊິງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ການນຳແຂວງ ແລະ ປະຊາຊົນຍາດມາໄດ້. ພ້ອມນີ້ ທ່ານກໍໄດ້ ເນັ້ນໜັກໃຫ້ຄະນະພັກ. ຄະນະນຳຂອງແຂວງ, ເມືອງຈົ່ງເອົາໃຈໃສ່ໃນການສຶກສາອົບຮົມແນວຄິດໃຫ້ແກ່ພະນັກງານ ແລະ ປະຊາຊົນ ໃຫ້ເຊື່ອມຊຶມຕໍ່ແນວທາງນະໂຍບາຍຂອງ ພັກ-ລັດ ເຂົ້າໃນກົດລະບຽບກົດໝາຍ. ເອົາໃຈໃສ່ຈັດຕັ້ງປະຕິບັດຜັນຂະຫຍາຍມະຕິ 9 ຂອງພັກ ໃຫ້ປະກົດຜົນເປັນຈິງເອົາໃຈໃສ່ ພັດທະນາ ເສດຖະກິດ ແກ້ໄຂຊີວິດການເປັນຢູ່ ຂອງປະຊາຊົນໃຫ້ດີຂຶ້ນ. ນຳພາປະເທດຊາດຫຼຸດພົ້ນອອກຈາກຄວາມທຸກຍາກ ແລະ ກ້າວໄປສູ່ປະເທດອຸດສາຫະກຳໃນອານາຄົດ.

ພ້ອມນີ້ທ່ານກໍໄດ້ເນັ້ນໃຫ້ອຳນາດການປົກຄອງແຂວງ ເມືອງ ຕ້ອງປັບປຸງແກ້ໄຂບັນຫາຈຸດອ່ອນ ແລະ ຂໍ້ຄົງຄ້າງທີ່ຍັງກົດໜ່ວງການພັດທະນາກໍຄືການຂະຫຍາຍຕົວ ຂອງເສດຖະ ກິດໃຫ້ຕົກໄປຢ່າງຂາດຕົວ. ໂດຍອີງໃສ່ມະຕິ 9 ໂດຍສະເພາະແມ່ນການປະຕິບັດ 4 ບຸກທະລຸ. ເອົາໃຈໃສ່ສົ່ງເສີມກຳລັງແຮງສັງລວມຂອງຊາດ, ຂອງທ້ອງຖິ່ນ. ຊຸກຍູ້ການລົງທຶນ ການພັດທະນາທ້ອງຖິ່ນໃຫ້ເຂັ້ມແຂງທາງດ້ານການຈັດຕັ້ງ ແລະ ເສດຖະກິດຕາມທິດສາມສ້າງ.

ຄຽງຄູ່ກັນນັ້ນທ່ານກໍໄດ້ເນັ້ນໃຫ້ຄະນະພັກອຳນາດການປົກຄອງແຂວງ ເອົາໃຈໃສ່ໃນການສ້າງບຸກຄະລະກອນ ທີ່ມີຄວາມຮູ້ຄວາມສາມາດ ປະກອບສ່ວນເຂົ້າໃນວຽກງານຂະແໜງ ການຕ່າງໆ ໃຫ້ແທດເໝາະ ແລະ ທັນກັບສະພາບຄວາມຮຽກຮ້ອງຕ້ອງການຂອງການພັດທະນາໃນໄລຍະໃໝ່.

 

Add comment


Security code
Refresh