ອອປສ ແຫ່ງ ສສ ຫວຽດນາມ ປະດັບ​ຫລຽນ​ໄຊ ​ໃຫ້​ ອອ​ປ​ສ ​ແຫ່ງ ​ສປປ ລາວ

(ຂປລ): ໂດຍໄດ້ຮັບການມອບໝາຍຈາກ ພັກ-ລັດຖະບານ ແຫ່ງ ສສ.ຫວຽດນາມ, ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໄດ້ປະດັບຫລຽນໄຊ ໃຫ້ແກ່ອົງ ການໄອຍະການປະຊາຊົນສູງສຸດ (ອອປສ) ແຫ່ງ ສປປ ລາວ ຈັດຂຶ້ນໃນວັນທີ 19 ທັນວາ 2012, ທີ່ນະຄອນຫລວງວຽງຈັນ.

ໃຫ້ກຽດປະດັບຫລຽນ ແລະ ໃບຍ້ອງຍໍໃນຄັ້ງນີ້ ໂດຍ ທ່ານ ຫວງຽນຮ່ວາ ບິງ ຊຶ່ງມີຫລຽນໄຊເອກະລາດຊັ້ນ II ໃຫ້ອົງການໄອຍະການປະຊາຊົນສູງສຸດ ແຫ່ງ ສປປ ລາວ, ປະ ດັບຫລຽນໄຊເອກະລາດຊັ້ນ I ໃຫ້ ທ່ານ ສົມພັນ ແພງຄຳມີ, ຮອງປະທານສະພາແຫ່ງຊາດ, ອະດີດຫົວໜ້າອົງການໄອຍະການປະຊາຊົນສູງສຸດ, ປະດັບຫລຽນໄຊເອກະລາດ ຊັ້ນ II ໃຫ້ທ່ານ ຄຳສານ ສຸວົງ, ຫົວໜ້າອົງການໄອຍະການປະຊາຊົນສູງສຸດ, ປະດັບຫລຽນໄຊເອກະລາດຊັ້ນ III ໃຫ້ທ່ານ ຄຳປານ ພິລາວົງ, ລັດຖະມົນຕີວ່າການກະຊວງພາຍໃນ, ອະດີດ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ, ປະດັບຫລຽນໄຊຈາລຶກປົກປ້ອງກົດໝາຍຂອງອົງການໄອຍະການປະຊາຊົນສູງສຸດ ແຫ່ງ ສ.ສ ຫວຽດນາມ ໃຫ້ແກ່ ທ່ານ ຄຳສານ ສຸວົງ, ຫົວໜ້າອົງການໄອຍະການປະຊາຊົນສູງສຸດ, ທ່ານ ລັງສີ ບຸນເຮືອງ ແລະ ທ່ານ ໄຊຊະນະ ໂຄດພູທອນ ຮອງຫົວໜ້າອົງການໄອຍະການປະຊາຊົນສູງສຸດ ແລະ ມອບໃບຍ້ອງຍໍຂອງຫົວໜ້າອົງການໄອຍະການປະຊາຊົນສູງສຸດ ແຫ່ງ ສ.ສ ຫວຽດ ນາມ ໃຫ້ແກ່ກົມກອງ, ຫ້ອງການ, ພະແນກ ແລະ ອົງການໄອຍະການປະຊາຊົນແຂວງສະ ຫວັນນະເຂດ ທີ່ມີຄຸນງາມຄວາມດີ-ຜົນງານດີເດັ່ນໃນການຊ່ວຍເຫລືອອັນລ້ຳຄ່າ ໃນການສ້າງກິດຈະກຳແລກປ່ຽນສິລະປະ-ກິລາ ຂອງສອງອົງການໄອຍະການ ລາວ- ຫວຽດນາມ ກໍຄືການເສີມຂະຫຍາຍສາຍພົວພັນ ມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ສອງພັກ-ລັດ ແລະ ປະຊາຊົນສອງຊາດ ລາວ-ຫວຽດນາມ ໂດຍສະເພາະແມ່ນການພົວພັນຮ່ວມມືລະຫວ່າງ ອົງການໄອຍະການປະຊາຊົນສູງສຸດ ສ.ສ ຫວຽດນາມ ແລະ ສປປ ລາວ ທີ່ໄດ້ເພີ່ມພູນຄູນສ້າງມາແລ້ວນັ້ນໃຫ້ນັບມື້ນັບເລິກເຊິ່ງ ເຂົ້າສູ່ລວງເລິກ ແລະ ປະສົບຜົນສຳເລັດຫລາຍດ້ານຂຶ້ນຢ່າງບໍ່ຢຸດຢັ້ງ.

ທ່ານ ຫວງຽນຮ່ວາ ບິງ, ຫົວໜ້າ ອອປສ ແຫ່ງ ສ.ສ ຫວຽດນາມ ແລະ ຄະນະ ໄດ້ເດີນທາງມາຢ້ຽມຢາມ ແລະ ເຄື່ອນເຮັດວຽກຢູ່ ສປປ ລາວ ລະຫວ່າງວັນທີ 18-20 ທັນວາ 2012 ທີ່ນະຄອນຫລວງວຽງຈັນ, ເພື່ອເປັນການສະເຫລີມສະຫລອງປີສາມັກ ຄີມິດຕະພາບ ລາວ-ຫວຽດ ນາມ.

 

Add comment


Security code
Refresh