ກຳມະການຂົນສົ່ງໃຊ້ງົບ 12 ຕື້ກີບຮັບໃຊ້ມ.ອາຊຽນ

ກຳມະການຂົນສົ່ງ ເປັນຫນຶ່ງໃນຫລາຍກຳມະການມີຫນ້າທີ່ຮັບຜິດຊອບຂົນສົ່ງບັນດາຄະນະຜູ້ແທນ, ຫົວຫນ້ານັກກີລາ, ນັກສະແດງ ແລະ ມວນຊົນໃນງານມະຫະກຳກິລາ ມະຫາ ວິທະຍາໄລອາຊຽນຄັ້ງທີ 16 ທີ່ ສປປ ລາວ ເປັນເຈົ້າພາບ, ຮອດປະຈຸບັນຫັນວ່າການຂົນສົ່ງດຳເນີນໄປດ້ວຍດີເຊິ່ງມີລົດຮັບໃຊ້ທັງຫມົດຈຳນວນ 600 ກວ່າຄັນ ແລະ ໃຊ້ງົບ ປະມານສູງເຖິງ 12 ຕື້ກີບ.

ທ່ານ ບົວລິດ ປະທຸມທອງ, ຮອງຫົວຫນ້າກົມຂົນສົ່ງ, ກະຊວງໂຍທາທິການ ແລະ ຂົນສົ່ງ ຮອງຫົວຫນ້າກຳມະການຝ່າຍຂົນສົ່ງງານມະຫາກຳກິລາ ມ.ອາຊຽນ ຄັ້ງທີ 16 ໃຫ້ສໍາ ພາດຕໍ່ສື່ມວນຊົນວ່າ: ນັບແຕ່ການກະກຽມຂົນສົ່ງຄະນະນັກກີລາປະເທດຕ່າງໆ, ຄະນະຜູ້ແທນ, ນັກສະແດງ ແລະ ອື່ນໆ ຮອດປະຈຸບັນນີ້ ເຫັນວ່າການຂົນສົ່ງດຳເນີນໄປຕາມ ແຜນ, ສາມາດອຳນວຍຄວາມສະດວກ ໃຫ້ແກ່ພາກສ່ວນຕ່າງໆໄດ້ເປັນຢ່າງດີໂດຍມີລົດຮັບໃຊ້ງານດັ່ງກ່າວຈຳນວນ 600 ກວ່າຄັນ ແລະ ງົບປະມານໃນການບໍລິຫານທັງຫມົດ 12 ຕື້ກີບ.

ລົດຈຳນວນ 600 ກວ່າຄັນປະກອບມີລົດເກງ 67 ຄັນທີ່ຮັບໃຊ້ສະເພາະແຂກພິເສດ ( VIP1) (VIP2), (ມີບັນດາລັດຖະມົນຕີກະຊວງສຶກສາຂອງປະເທດຕ່າງໆ, ບັນດາອະ ທິການບໍດີ, ຫົວຫນ້າຄະນະນຳ ແລະ ນັກກິລາ); ສ່ວນລົດຕູ້ 9-12 ບ່ອນນັ່ງ ມີ 163 ຄັນ ທີ່ຮັບໃຊ້ແກ່ບັນດາຄະນະກຳມະການຈັດງານ, ກຳມະການຕັດສິນ, ນັກຂ່າວ ແລະ ອື່ນໆ, ນອກນີ້ຍັງໄດ້ມີການຈັດລົດຕູ້ມາເພີ່ມອີກ 11 ຄັນເພື່ອມາຮອງຮັບບັນດານັກກິລາທີ່ບໍ່ໄດ້ນອນຢູ່ໃນບ້ານພັກນັກກິລາ.

ສ່ວນລົດເມໃຫຍ່ແມ່ນມີ 161 ຄັນເພື່ອຂົນສົ່ງບັນດານັກສະແດງປະມານ 3-4 ພັນຄົນ ແລະ ນັກກີລາໄປຝຶກຊ້ອມ ແລະ ແຂ່ງຂັນ ພ້ອມທັງຍັງໄດ້ແບ່ງ 27 ຄັນ ເພື່ອແລ່ນປະຈຳ ສາຍທາງເຊິ່ງປະກອບມີສາຍທາງຈາກບ້ານພັກກີລາ ຫາສະຫນາມກີລາແຫ່ງຊາດ (ຫລັກ 16), ສາຍທາງຈາກບ້ານພັກນັກກີລາ ຫາສະຫນາມກີລາເຈົ້າອານຸວົງ, ສາຍທາງຈາກບ້ານພັກ ນັກກີລາ ຫາສະຫນາມກີລາບຶງຂະຫຍອງ, ສາຍທາງຈາກບ້ານພັກນັກກີລາແລ່ນໃນບໍລິເວນມະຫາວິທະຍາໄລແຫ່ງຊາດ ແລະ ສາຍທາງຈາກບ້ານພັກກີລາ ຫາສະຫນາມບິນວັດໄຕ ສຳລັບພະນັກງານຂັບລົດກໍ່ໄດ້ຜ່ານການຝຶກອົບຮົມມາເປັນຢ່າງດີທາງດ້ານເຕັກນິກ, ລະບຽບວິໄນ, ການປາກເວົ້າຕະຫລອດຮອດການນຸ່ງຖືຕ້ອງເປັນລະບຽບ ແລະ ເອກະພາບກັນ ທ່ານ ບົວລິດ ປະທຸມທອງ ກ່າວ.

ທ່ານ ບົວລິດ ປະທຸມທອງຍັງກ່າວວ່າ: ລົດເມແລ່ນຕາມສາຍທາງທີ່ກຳນົດໄວ້ 5 ສາຍຄື: ສາຍທີ 1 ສາຍສີແດງ ແຕ່ບ້ານພັກນັກກິລາ-ສະຫນາມກິລາແຫ່ງຊາດຫລັກ 16 ມີ ທັງ ຫມົດ 10 ຄັນ, ສາຍທີ 2 ສາຍສີມ້ວງ ແຕ່ບ້ານພັກນັກກິລາ- ສະຫນາມກິລາເຈົ້າອານຸວົງສະໜາມກິລາຍູໂດມີ 5 ຄັນ, ສາຍທີ 3 ສາຍສີຟ້າ ແຕ່ບ້ານພັກນັກກິລາສະຫນາມກິລາ ບຶງຂະຫຍອງມີ 2 ຄັນ, ສາຍທີ 4 ສາຍສີຂຽວ ແຕ່ບ້ານພັກນັກກິລາ-ສະຫນາມບິນວັດໄຕສາກົນມີ 3 ຄັນ, ສາຍທີ 5 ສາຍສີສົ້ມ ແຕ່ບ້ານພັກ ນັກກິລາ-ມະຫະຫາວິທະຍາໄລ ແຫ່ງຊາດ (ດົງໂດກ) ມີທັງຫມົດ 5 ຄັນໂດຍມີສາຍລົດທີ່ເຮົາໄດ້ກຳນົດໄວ້ກຳນົດແລ່ນແຕ່ເວລາ 06:30-20:30 ໂມງ ແລະ ທຸກ 15-30 ນາທີ ອອກເທື່ອຫນຶ່ງສະນັ້ນເພື່ອຄວາມກະຈ່າງແຈ້ງສຳລັບຜູ້ທີ່ຈະໃຊ້ບໍລິການລົດ ທີ່ເຮົາກຳນົດໄວ້ສາມາດໃຊ້ໄດ້ສະເພາະຜູ້ທີ່ຖືບັດຮັບໃຊ້ງານກີລາ ມ.ອາຊຽນ ເທົ່ານັ້ນ (ຜູ້ທີ່ມີບັດຫ້ອຍຄໍ ) ແລະ ສາມາດໃຊ້ບໍລິການໄດ້ທັງ 5 ສາຍໂດຍບໍ່ໄດ້ເສຍຄ່າ (ຂີ່ລ້າໆ) ໂດຍຈຸດເລີ່ມຕົ້ນການອອກລົດຢູ່ທີ່ບ້ານພັກນັກກິລາ. ສ່ວນມວນຊົນທົ່ວໄປ ທີ່ຈະໄປຊົມໄປເຊຍນັກກິລາ ບໍ່ສາມາດໃຊ້ໄດ້ ແຕ່ຕ້ອງບໍລິການລົດ ປະຈຳສາຍທາງຂອງນະຄອນຫລວງວຽງຈັນເທົ່ານັ້ນ (ເສຍເງິນຄ່າລົດ)./.

 

Add comment


Security code
Refresh