ລັດລົງທຶນກວ່າ 40 ລ້ານໂດລາສ້າງທາງ 2E ປະຈຸບັນເປີດໃຊ້ແລ້ວ

ລັດລົງທຶນກວ່າ 40 ລ້ານໂດລາສ້າງທາງ 2E ປະຈຸບັນເປີດໃຊ້ແລ້ວ

      ເພື່ອເປັນການເຊື່ອມໂຍງ ແລະ ກະ­ກຽມໃນການສ້າງປະ­ຊາຄົມອາຊຽນຕາມແລວເສດ­ຖະ­ກິດຕາ­ເວັນອອກŒຕາ­ເວັນຕົກເສັ້ນ­ທາງ 2E ແຕ່ເມືອງຂວາ ແຂວງຜົ້ງສາ­ລີຫາຊາຍແດນໄຕຈາງ ແຂວງດຽນບຽນ ສສ ຫວຽດ­ນາມ ກໍ່ໄດ້ຮັບການກໍ່­ສ້າງ ແລະ ຍົກລະ­ດັບຂຶ້ນລວມຄວາມຍາວ 68,2 ກິ­ໂລ­ແມັດ ເຊິ່ງໄດ້ເລີ່ມການກໍ່­ສ້າງມາແຕ່ເດືອນພຶດ­ສະ­ພາ 2009 ແລະ ສຳ­ເລັດໃນເດືອນມັງ­ກອນ 2013 ດັ່ງ­ນັ້ນ ໃນວັນທີ 23 ກຸມ­ພາຜ່ານມາທີ່ດ່ານສາ­ກົນປາງຫົກŒໄຕຈາງ ເມືອງຂວາ ກໍ່ໄດ້ຈັດພິ­ທີມອບŒຮັບຢ່າງເປັນທາງການ ໂດຍເປັນກຽດເຂົ້າຮ່ວມຂອງ ທ່ານ ສົມສະ­ຫວາດ ເລັ່ງສະຫວັດ ຮອງນາ­ຍົກລັດຖະມົນ­ຕີ, ຜູ້ຊີ້ນຳວຽກງານເສດ­ຖະ­ກິດ ທັງເປັນປະ­ທານຄະ­ນະກຳ­ມາທິການຮ່ວມມືລາວŒຫວຽດ­ນາມ ແລະ ທ່ານ ຫງວຽນ ຊວນຟຸກ ຮອງນາ­ຍົກ­ລັດ­ຖະ­ມົນ­ຕີ ປະ­ທານຄະ­ນະກຳ­ມາທິການຮ່ວມມືຫວຽດ­ນາມŒລາວ ພ້ອມນີ້ ຍັງມີບັນ­ດາເຈົ້າ­ແຂວງŒຮອງເຈົ້າ­ແຂວງ, ລັດຖະມົນ­ຕີວ່າ­ການŒຊ່ວຍວ່າ­ການ, ກົມກອງ, ພະ­ແນກ­ການ ແລະ ຫ້ອງ­ການທີ່ກ່ຽວ­ຂ້ອງເຂົ້າຮ່ວມ.

       ເສັ້ນ­ທາງ 2E ນີ້ ເມື່ອກ່ອນເປັນເສັ້ນ­ທາງແຄບ, ບາງຫ້ວຍກໍ່ບໍ່ມີຂົວຂ້າມເຮັດໃຫ້­ການສັນຈອນໄປŒມາພົບຄວາມຫຍຸ້ງຍາກ ແລະ ສ່ວນຫລາຍທຽວໄດ້ລະ­ດູດຽວ. ມາຮອດປະ­ຈຸບັນເສັ້ນ­ທາງດັ່ງ­ກ່າວໄດ້ຮັບການຍົກລະ­ດັບເປັນເສັ້ນ­ທາງປູ­ຢາງ 2 ຊັ້ນ, ຫນ້າທາງກວ້າງ 7 ແມັດ ແລະ ມີຂົວ 8 ແຫ່ງ ນັບແຕ່ເມືອງຂວາ ຮອດຊາຍແດນໄຕຈາງ ລວມມູນຄ່າການກໍ່­ສ້າງ 43 ລ້ານໂດລາສະ­ຫະ­ລັດເຮັດໃຫ້ການສັນ­ຈອນ ແລະ ຄົມມະນາຄົມຂົນ­ສົ່ງມີຄວາມສະ­ດວກສະບາຍຫລາຍຂຶ້ນ.

      ໂອ­ກາດດັ່ງ­ກ່າວ ທ່ານ ສົມສະ­ຫວາດ ເລັ່ງສະຫວັດ ກໍ່ໄດ້ກ່າວວ່າ: ທາງ 2E ເປັນຫນຶ່ງໃນບັນ­ດາເສັ້ນ­ທາງເຊື່ອມຕໍ່ລະຫວ່າງລາວ ແລະ ຫວຽດ­ນາມ ທີ່ມີຄວາມຫມາຍສຳ­ຄັນຍິ່ງ, ເປັນເສັ້ນ­ທາງບຸ­ລິ­ມະ­ສິດໃນແຜນພັດທະນາເສດ­ຖະ­ກິດŒສັງ­ຄົມຂອງລັດ­ຖະ­ບານລາວ ເຊິ່ງໄດ້ຮັບທຶນຊ່ວຍ­ເຫລືອ ແລະ ກູ້ຢືມໄລ­ຍະ ຍາວດ້ວຍດອກເບ້ຍຜ່ອນ­ຜັນຈາກລັດ­ຖະ­ບານ ສສ ຫວຽດນາມ. ອັນເປັນການສ້າງເງື່ອນໄຂໃຫ້ລາວມີທາງອອກສູ່ທະ­ເລ, ເປັນເສັ້ນ­ທາງຜ່ານລະ­ຫວ່າງບັນດາປະ­ເທດໃນພາກພື້ນ ແລະ ອະນຸພາກພື້ນ, ສ້າງເງື່ອນ­ໄຂໃຫ້ແກ່ການພັດ­ທະ­ນາເສດ­ຖະ­ກິດŒສັງຄົມຂອງ ສປປ ລາວ ໂດຍສະເພາະແມ່ນດ້ານການຄົມມະນາຄົມຂົນ­ສົ່ງ, ການຄ້າ, ການລົງທຶນ, ການ­ທ່ອງ­ທ່ຽວ ແລະ ການໄປ­ມາ­ຫາ­ສູ່ກັນລະ­ຫວ່າງປະ­ຊາຊົນສອງປະ­ເທດລາວŒຫວຽດນາມ.

       ເວົ້າສະ­ເພາະບັນ­ດາແຂວງພາກເຫນືອຂອງສອງປະ­ເທດ ເຊິ່ງຈະເປັນໂອ­ກາດໃນການພັດທະນາແຂວງຕົນເອງ; ເຖິງວ່າປະ­ຊາ­ຊົນຫວຽດ­ນາມຍັງມີຄວາມຕ້ອງ­ການອັນຈຳ­ເປັນ ທາງດ້ານທຶນ­ຮອນເພື່ອສ້າງ­ສາພັດ­ທະ­ນາພື້ນ­ຖານໂຄງລ່າງເສດຖະກິດŒສັງ­ຄົມຢູ່ປະ­ເທດຂອງຕົນຢ່າງຫລວງ­ຫລາຍກໍ່ຕາມ ແຕ່ກໍ່ໄດ້ຕັດ­ສິນໃຈຊ່ວຍ­ເຫລືອປະ­ຊາ­ຊົນລາວດ້ວຍຄວາມຈິງໃຈ ໂດຍຖືວ່າ “ເຂົ້າເມັດຫັກຜັກເສັ້ນຫນຶ່ງກໍ່ບິແບ່ງໃຫ້ກັນ” ເຊິ່ງອັນນີ້ກໍ່ໄດ້ມາຈາກມູນ­ເຊື້ອແຫ່ງໄມ­ຕີຈິດມິດ­ຕະ­ພາບອັນຍິ່ງໃຫຍ່ ແລະ ຄວາມສາ­ມັກ­ຄີພິ­ເສດທີ່ປະທານ ໂຮ່ຈິມິນຜູ້ຍິ່ງໃຫຍ່ ແລະ ປະ­ທານ ໄກ­ສອນ ພົມ­ວິ­ຫານ ຜູ້ນຳທີ່ເຄົາ­ລົບຮັກໄດ້ເພີ່ມພູນຄູນສ້າງໄວ້ໃຫ້້ເຊັ່ນລູກ, ເຊັ່ນຫລານຂອງພວກເຮົາສືບທອດຕໍ່ໄປ.

       ໃນພິ­ທີຍັງໄດ້ມີການຍ້ອງ­ຍໍການນຳຂັ້ນສູງ, ບຸກ­ຄົນ ແລະ ກົມກອງທີ່ໄດ້ປະ­ກອບ­ສ່ວນຢ່າງຕັ້ງ­ຫນ້າເຮັດໃຫ້ໂຄງ­ການກໍ່ສ້າງເສັ້ນ­ທາງ 2E ປະ­ສົບຜົນສຳເລັດເປັນຢ່າງດີ, ພ້ອມນີ້ ທັງສອງຝ່າຍກໍ່ໄດ້ຮ່ວມກັນຕັດແຖບຜ້າເປີດນຳໃຊ້ເສັ້ນ­ທາງດັ່ງ­ກ່າວຢ່າງເປັນທາງການ.

 

ຂໍຂອບໃຈຂ່າວຈາກ http://www.ecom.org.la

 

Add comment


Security code
Refresh