ຍີ່ປຸ່ນຊ່ວຍລ້າເກືອບ 4 ແສນໂດລາພັດທະນາການສຶກສາຢູ່ລາວ

ຍີ່ປຸ່ນຊ່ວຍລ້າເກືອບ 4 ແສນໂດລາພັດທະນາການສຶກສາຢູ່ລາວ

 

ຂ່າວ: ສຸກວິໄລ

    ຍ້ອນເຫັນໄດ້ເຖິງຄວາມສຳຄັນຂອງວຽກງານການສຶກສາ, ລັດຖະບານ ແລະ ປະຊາຊົນຍີ່ປຸ່ນ ໄດ້ໃຫ້ທຶນຊ່ວຍເຫລືອລ້າ 5 ໂຄງການພັດທະນາການລວມມູນຄ່າເກືອບ 4 ແສນໂດລາສະຫະລັດ ເພື່ອໃຫ້ເດັກນ້ອຍລາວໄດ້ຮັບໂອກາດທາງການສຶກສາທີ່ດີຂຶ້ນ.

   ປະຈຸບັນ ສະພາບການສຶກສາຢູ່ ສປປ ລາວ ໃນເຂດຕົວເມືອງ ແລະ ຊົນນະບົດມີຄວາມແຕກຕ່າງກັນຫລາຍ ໂດຍສະເພາະເຂດຊົນນະບົດນອກຈາກຈຳນວນໂຮງຮຽນ ແລະ ຫ້ອງຮຽນບໍ່ພຽງພໍ ເພື່ອຮອງຮັບຈຳນວນນັກຮຽນທີ່ເພີ່ມຂຶ້ນໃນແຕ່ລະປີແລ້ວການເດີນທາງໄປຮຽນກໍ່ມີຄວາມຫຍຸ້ງຍາກ ເນື່ອງຈາກຖະຫນົນຫົນທາງບໍ່ດີ ແລະ ບ້ານເຮືອນກໍ່ຕັ້ງຫ່າງໄກຈາກໂຮງຮຽນ ເຊິ່ງເປັນສາ ເຫດຫນຶ່ງທີ່ເຮັດໃຫ້ອັດຕາການເຂົ້າຮຽນໃນຊັ້ນມັດທະຍົມຫລຸດລົງ.

   ສະນັ້ນ, ລັດຖະບານຍີ່ປຸ່ນ ເຫັນໄດ້ເຖິງຄວາມສຳຄັນຂອງການສຶກສາ ຈິ່ງໃຫ້ທຶນກໍ່ສ້າງໂຮງຮຽນຈຳນວນ 5 ໂຄງການປະ ກອບມີ: ໂຄງການກໍ່ສ້າງໂຮງຮຽນ ແລະ ຫໍພັກມັດທະຍົມຕອນຕົ້ນບ້ານນາທົ່ງ ເມືອງນາຫມໍ້ ແຂວງອຸດົມໄຊ, ໂຮງຮຽນມັດທະຍົມຕອນຕົ້ນບ້ານທົ່ງນາມີ ເມືອງປາກກະດິງ ແຂວງບໍລິຄຳໄຊ, ໂຮງຮຽນມັດທະຍົມຕອນຕົ້ນບ້ານຫົວເມືອງໆທ່າແຕງແຂວງເຊກອງ, ໂຮງຮຽນມັດທະຍົມຕອນຕົ້ນບ້ານນາເກືອເຫນືອ ເມືອງແອດ ແຂວງຫົວພັນ ແລະ ໂຄງການກໍ່ສ້າງໂຮງຮຽນປະຖົມສົມບູນບ້ານລ້ວງໂຊ້ ເມືອງມຸນລະປະໂມກ ແຂວງຈຳປາສັກ ລວມມູນຄ່າກໍ່ສ້າງທັງຫມົດ 389.094 ໂດລາສະຫະລັດ.

   ເຊິ່ງການຊ່ວຍເຫລືອຄັ້ງນີ້ ເປັນການປະກອບສ່ວນປັບປຸງສະພາບການສຶກສາຢູ່ ສປປ ລາວ ແລະ ເຮັດໃຫ້ເດັກນ້ອຍລາວໄດ້ຮັບໂອກາດເຂົ້າເຖິງການສຶກສາທີ່ດີຂຶ້ນ.

   ມາຮອດປະຈຸບັນ ລັດຖະບານຍີ່ປຸ່ນຊ່ວຍກໍ່ສ້າງໂຮງຮຽນແລ້ວທັງຫມົດ 439 ຫລັງ ໃນນັ້ນ ມີໂຮງຮຽນປະຖົມ 376 ຫລັງ, ໂຮງຮຽນມັດທະຍົມ 63 ຫລັງ ແລະ ຫໍພັກນັກຮຽນ 10 ຫລັງ.

   ພິທີລົງນາມມີຂຶ້ນໃນຕອນເຊົ້າວານນີ້ ທີ່ກະຊວງສຶກສາທິການ ແລະ ກີລາຕາງຫນ້າລັດຖະບານຍີ່ປຸ່ນ ເຊັນໂດຍທ່ານ ນາງ ຈຸນໂກະ ໂຢໂກຕະ ເອກອັກຄະລາຊະທູດຍີ່ປຸ່ນປະຈຳ ສປປ ລາວ ແລະ ຜູ້ຕາງຫນ້າຈາກ 5 ແຂວງ,ມີທ່ານ ດຣ. ພັນຄຳ ວິພາວັນ ລັດຖະມົນຕີວ່າການກະຊວງສຶກສາທິການ ແລະ ກີລາ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ຂໍຂອບໃຈຂ່າວຈາກ http://www.ecom.org.la  

 

Add comment


Security code
Refresh