ທ່ານຮອງປະທານປະເທດ ຕ້ອນຮັບທູດໂອຕຣິດ ເຂົ້າຢ້ຽມອຳລາ

 

ຂປລ. ໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ. ລາວ ທ່ານ ບຸນຍັງ ວໍລະຈິດ, ຮອງປະທານປະເທດ ແຫ່ງ ສປປ.ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມອຳລາ ຂອງທ່ານ ດຣ. ໂຈຮັນ ປີເຕີ ລິກ (Johannes PETERLIK) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງປະເທດໂອຕຣິດ ປະຈຳລາວ ໃນຕອນບ່າຍ ວັນທີ 10 ມິຖຸນາ 2013 ທີ່ທຳນຽບປະທານປະເທດ.

 

ໃນໂອກາດນີ້ ທ່ານຮອງປະທານປະເທດ ບຸນຍັງ ວໍລະຈິດ ໄດ້ສະແດງຄວາມຊົມເຊີຍຕໍ່ຜົນງານການປະຕິບັດໜ້າ ຂອງທ່ານເອກອັກຄະລັດຖະທູດ ຊຶ່ງສິ່ງດັ່ງກ່າວ ໄດ້ປະກອບ ສ່ວນສຳຄັນ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງ ສປປ. ລາວ ຍັງເປັນການເສີມຂະຫຍາຍສາຍ ພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດໃຫ້ນັບມື້ຂະຫຍາຍຕົວຍິ່ໆງຂຶ້ນ ພ້ອມນີ້ ທ່ານຮອງປະທານປະເທດ ຍັງອວຍພອນໃຫ້ທ່ານທູດ ຈົ່ງປະສົບຜົນສຳເລັດໃນການປະຕິບັດໜ້າທີ່ໃໝ່ ແລະ ໃຫຍ່ຫລວງ ກວ່າເກົ່າ.

 

ທ່ານເອກອັກຄະລັດຖະທູດ ໄດ້ກ່າວສະແດງຄວາມຂອບໃຈ ຕໍ່ລັດຖະບານລາວທີ່ໃຫ້ການຮ່ວມມື ແລະ ອຳນວຍຄວາມສະດວກທຸກດ້ານ ຕະຫລອດໄລຍະການປະຕິບັດໜ້າທີ່ ການທູດ ຢູ່ ສປປ.ລາວ ຊຶ່ງໄດ້ປະກອບສ່ວນໃຫ້ໂຄງການຮ່ວມມືຕ່າງ ລະຫວ່າງ ລັດຖະບານລາວ ແລະ ໂອຕຣິດ ມີຜົນສຳເລັດຢ່າງຈົບງາມ.

 

ທ່ານເອກອັກຄະລັດຖະທູດ ໂຈຮັນ ປີເຕີລິກ ເລີ່ມປະຕິບັດໜ້າທີ່ການທູດ ຢູ່ ສປປ.ລາວ ນັບແຕ່ປີ 2009 ເປັນຕົ້ນມາ. ຕະຫລອດໄລຍະການປະຕິບັດໜ້າທີ່ນັ້ນ ທ່ານໄດ້ເອົາ ໃຈໃສ່ ໃນການເສີມຂະຫຍາຍສາຍພົວພັນ ຮ່ວມມື ລະຫວ່າງ ສອງປະເທດລາວ ແລະ ໂອຕຣິດ ໃຫ້ນັບມື້ແຕກດອກອອກຜົນຢ່າງບໍ່ຢຸດຢັ້ງ ສະແດງອອກໃນການແລກປ່ຽນ ຢ້ຽມຢາມ ຂອງຄະນະຜູ້ແທນຂັ້ນສູງທັງສອງປະເທດ, ໄດ້ດຶງດູດເອົາການລົງທຶນຂອງນັກທຸລະກິດໃຫ້ມາລົງທຶນຢູ່ ສປປ.ລາວ ໃນຂະແໜງກະສິກຳ, ສຶກສາ, ສາທາລະນະສຸກ ແລະ ອື່ນໆ. ໂດຍສະເພາະໃນປີ 2010 ລັດຖະບານໂອຕຣິດ ໄດ້ສະເໜີເງິນກູ້ດອກເບ້ຍຕ່ຳ ໃຫ້ລັດຖະບານລາວຈຳນວນ 4 ລ້ານກວ່າເອີໂຣ ເພື່ອຊື້ອຸປະກອນການແພດ ທີ່ທັນສະໄໝພ້ອມທັງ ສະໜອງເງິນກູ້ດອກເບ້ຍຕ່ຳ ມູນຄ່າ 1,9 ລ້ານເອີໂຣ ເພື່ອສ້າງໂຄງການຊົນລະປະທານຕົວແບບ ໂດຍນຳໃຊ້ລະບົບຝົນຝອຍ ເຂ້າໃນການຜະລິດກະສິກຳ ເປັນສິນຄ້າ ຊຶ່ງໂຄງການ ດັ່ງກ່າວ ແມ່ນກະຊວງກະສິກຳ ແລະ ປ່າໄມ້ເປັນຜູ້ຈັດຕັ້ງປະຕິບັດ ແລະ ເມື່ອບໍ່ດົນມານີ້ ລັດຖະບານໂອຕຣິດ ໄດ້ແຈ້ງຈຸດປະສົງຮ່ວມມື ດ້ານການສຶກສາຂ້ນສູງກັບຝ່າຍລາວ ໃນນີ້ບໍລິສັດ ລົງທຶນຂອງໂອຕຣິດ ມີຄວາມສົນໃຈຈະສ້າງໂຄງການຝຶກອົບຮົມວິຊາຊີບ ໃນມູນຄ່າ 5 ລ້ານເອີໂຣ ຢູ່ນະຄອນຫລວງ ວຽງຈັນ./.

ຂໍຂອບໃຈຂ່າວຈາກ http://www.ecom.org.la