ສູນ​ກາງ​ແນວ​ລາວ​ສ້າງ​ຊາດ ​ເຊື່ອມ​ຊຶມ​ມະຕິ VI ສະ​ໄໝ​ທີ IX ຂອງຄະນະ​ບໍລິຫານ​ງານ​ສູນ​ກາງ​ພັກ


ຂປລ. ລາຍງານຂ່າວຈາກສູນກາງແນວລາວສ້າງຊາດ ໃຫ້ຮູ້ວ່າ: ໃນຕອນເຊົ້າຂອງວັນທີ 7 ມີຖຸນາ 2013 ນີ້, ຢູ່ທີ່ສຳນັກງານສູນກາງແນວລາວສ້າງຊາດ ໄດ້ຈັດພິທີເຊື່ອມຊຶມມະຕິ VI ສະໄໝທີ IX ຂອງຄະນະບໍລິຫານງານສູນກາງພັກ ໂດຍການບັນຍາຍຂອງທ່ານ ສຈ. ດຣ. ພັນດວງຈິດ ວົງສາ, ກຳມະການສູນກາງພັກ, ປະທານສູນກາງແນວລາວສ້າງຊາດ, ມີບັນດາ ທ່ານຮອງປະທານ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ຕະຫລອດຮອດ ພະນັກງານ-ລັດຖະກອນ ຂອງສູນກາງແນວລາວສ້າງຊາດ ເຂົ້າຮ່ວມ ຮັບຟັງ.

ທ່ານ ສຈ. ດຣ. ພັນດວງຈິດ ວົງສາ ໄດ້ຍົກໃຫ້ເຫັນວ່າ: ກອງປະຊຸມຄົບຄະນະຄັ້ງທີ VI ຂອງຄະນະບໍລິຫານງານສູນກາງພັກ ສະໄໝທີ IX ແມ່ນໄດ້ດຳເນີນ ແຕ່ວັນທີ 6-16 ພຶດສະພາ 2013, ພາຍໃຕ້ການເປັນປະທານ ຂອງ ສະຫາຍ ຈູມມາລີ ໄຊຍະສອນ, ເລຂາທິການໃຫຍ່ ຄະນະບໍລິຫານງານສູນກາງພັກ, ກອງປະຊຸມໄດ້ທົບທວນຄືນສະ ພາບການ ຈັດຕັ້ງປະຕິບັດ ບັນດາຄາດໝາຍສູ້ຊົນທີ່ກຳນົດໄວ້ ຢູ່ໃນມະຕິກອງປະຊຸມໃຫຍ່ ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ໃນໄລຍະເຄິ່ງ ສະໄໝ; ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ເງິນຕາໃນ 6 ເດືອນຕົ້ນສົກປີ, ປຶກສາຫາລືໃຫ້ທິດຊີ້ນຳການ ຈັດຕັ້ງປະຕິບັດ 6 ເດືອນທ້າຍສົກປີ 2012-2013 ແລະ ທິດທາງໃນສົກປີ 2013-2014, ພ້ອມກັນນັ້ນ, ກໍໄດ້ສຳຫລວດກວດກາ, ຕຳນິຕິຊົມກ່ຽວກັບການຊີ້ນຳໆພາລວມ ຂອງຄະນະບໍລິຫານງານ ສູນກາງພັກໃນໜຶ່ງປີຜ່ານມາ. ໃນນີ້, ກອງປະຊຸມຍັງໄດ້ຮຽກຮ້ອງ ໃຫ້ກຳມະການຄະນະບໍລິຫານງານສູນກາງພັກແຕ່ລະສະຫາຍ ຈະຕ້ອງໄດ້ສືບຕໍ່ເພີ່ມທະວີຄວາມເອົາໃຈໃສ່ຊີ້ນຳ ໃນວຽກງານທຸກດ້ານ ກໍຄືເອົາໃຈໃສ່ຈັດຕັ້ງປະຕິບັດຄາດໝາຍ ທີ່ກອງປະຊຸມໃຫຍ່ ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VII ວາງອອກ ໃຫ້ມີຜົນສຳເລັດໃນຂົງເຂດວຽກງານຕ່າງໆ, ຕ້ອງມີການຫັນປ່ຽນດີຂື້ນຢ່າງຈະແຈ້ງກວ່າເກົ່າ; ຮັບປະກັນໃຫ້ປະເທດຊາດມີສະຖຽນລະພາບທາງການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍຢ່າງໜັກແໜ້ນ; ສືບຕໍ່ຢືດ ໝັ້ນເສດຖະກິດເປັນໃຈກາງ ຕິດພັນກັບການພັດທະນາສັງຄົມ ແລະ ການປົກປັກຮັກສາສິ່ງແວດລ້ວມ, ຮັກສາການຂະຫຍາຍ ເສດຖະກິດໃນຈັງຫວະຕໍ່ເນື່ອງ ແລະ ໝັ້ນທ່ຽງ ໄປຕາມທິດພັດທະນາແບບຍືນຍົງ, ສືບຕໍ່ແກ້ໄຂຄວາມທຸກຍາກຂອງປະຊາຊົນ ເພື່ອບັນລຸຄາດໝາຍສະຫັດສະວັດດ້ານການພັດທະນາ ເມື່ອຮອດປີ 2015. ພ້ອມກັນນີ້, ກອງປະຊຸມ ຍັງໄດ້ເນັ້ນໃຫ້ອົງການແນວລາວສ້າງຊາດ, ຊາວໜຸ່ມ, ແມ່ຍິງ, ກຳມະບານ ແລະ ສະຫະພັນນັກຮົບເກົ່າ, ຕ້ອງໄດ້ເພີມທະວີຄວາມ ເອົາໃຈໃສ່ສຶກສາອົບຮົມການເມືອງແນວຄິດໃຫ້ປະຊາຊົນ, ຊັ້ນຄົນຕ່າງໆ ມີຄວາມຮັບຮູ້ເຊື່ອມຊຶມແນວທາງນະໂຍບາຍຂອງພັກຢ່າງເລິກເຊິງ ແລະ ເຮັດໃຫ້ເຂົາເຈົ້າເສີມ ຂະຫຍາຍ ນ້ຳໃຈຮັກຊາດ, ຮັກລະບອບໃໝ່, ສິດເປັນເຈົ້າຂອງປະເທດຊາດ ແລະ ມີຈິດໃຈເພີ່ງຕົນເອງ, ສ້າງຄວາມຮັ່ງມີເຂັ້ມແຂງດ້ວຍຕົນເອງ, ອີງໃສ່ທ່າແຮງບົ່ມຊ້ອນ ຢູ່ແຕ່ລະທ້ອງຖິ່ນ ເພື່ອປົກປັກຮັກສາ ແລະ ສ້າງສາພັດທະນາບ້ານຊ່ອງຂອງຕົນ, ເອົາໃຈໃສ່ສະກັດກັ້ນ ແລະ ຕ້ານທຸກການມ້າງເພທຳລາຍປະເທດຊາດ ຂອງອິດທິກຳລັງປໍລະປັກ ແລະ ພວກຄົນ ບໍ່ຫວັງດີ, ສົ່ງເສີມບັນດາອົງການຈັດຕັ້ງສັງຄົມວິຊາຊີບ ແລະ ສະມາຄົມຕ່າງໆ ເຄື່ອນໄຫວຖືກຕ້ອງຕາມກົດໝາຍ, ປຸກລະດົມທົ່ວປວງຊົນ ເພື່ອເປັນກຳລັງແຮງສັງລວມ ໃນການ ກະກຽມ ສະເຫຼີມສະຫຼອງວັນປະຫວັດສາດ, ວັນສ້າງຕັ້ງພັກປະຊາຊົນ ປະຕິວັດລາວ, ວັນສະຖາປະນາ ສປປ. ລາວ ຄົບຮອດ 40 ປີ ແລະ ກອງປະຊຸມໃຫຍ່ຄັ້ງທີ X ຂອງພັກ, ຄັ້ງທີ X ຂອງອົງການແນວລາວສ້າງຊາດ ຢ່າງເປັນຂະບວນຟົດຟື້ນ, ພ້ອມກັນນີ້, ທ່ານປະທານສູນກາງແນວລາວສ້າງຊາດ ໄດ້ແນະນຳໃຫ້ພະນັກງານ-ລັດຖະກອນ ຂອງສູນກາງແນວລາວ ສ້າງຊາດ ຈົ່ງເພີມທະວີສຶກສາຄົ້ນຄ້ວາຮ່ຳຮຽນເຊື່ອມຊຶມແນວທາງນະໂຍບາຍຂອງພັກ ເພື່ອຕິດພັນກັບການຈັດຕັ້ງປະຕິບັດ ໃນຂົງເຂດວຽກງານແນວລາວສ້າງຊາດ ໃຫ້ແທດເໝາະ ກັບພາລະບົດບາດ, ສິດ ແລະ ໜ້າທີຂອງຕົນເປັນຢ່າງດີ./.

 

ຂໍຂອບໃຈຂ່າວຈາກ http://www.ecom.org.la