ຄະນະ​ຜູ້​ແທນ​ແມ່ຍິງ​ລາວ ​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ແມ່ຍິງ​ໂລກ​ປີ 2013

 

ຂປລ. ໂດຍຕອບສະໜອງຕາມຄຳເຊີນຂອງທ່ານ ນາງ Datin Sri Rosmah Mansor, ພັນລະຍາຂອງ ທ່ານ ນາຍົກນາຈິບ ແຫ່ງ ມາເລເຊຍ, ທ່ານ ດຣ. ນາງ ແກ້ວສາຍໃຈ ໄຊຍະສອນ, ພັນລະຍາປະທານປະເທດແຫ່ງ ສປປ ລາວ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດແມ່ຍິງໂລກ ປີ 2013 ແລະ ກອງປະຊຸມເວທີປຶກສາຫາລືພິເສດ ຂອງບັນດາພັນລະຍາການນຳຂັນສູງຂອງປະເທດຕ່າງໆໃນໂລກ ໂດຍພາຍໃຕ້ຫົວຂໍ້ທີ່ວ່າ: ແມ່ຍິງກັບການສ້າງເສດຖະກິດຍຸກໃໝ່ ໃນວັນທີ 5-7 ມິຖຸນາ 2013 ທີ່ຜ່ານມາທີ່ ກົວລາລຳເປີ ປະເທດມາເລເຊຍ.

ໃນໂອກາດດັ່ງກ່າວ ທ່ານ ດຣ. ນາງ ແກ້ວສາຍໃຈ ໄຊຍະສອນ ໄດ້ກ່າວປາໄສໃນວາລະກອງປະຊຸມເວທີປຶກສາຫາລືພິເສດ ຂອງບັນດາພັນລະຍາການນຳຂັ້ນສູງ ໂດຍ ທ່ານໄດ້ ເນັ້ນເຖິງບົດບາດຄວາມສຳຄັນຂອງແມ່ຍິງໃນທົ່ວໂລກ ພ້ອມທັງແມ່ຍິງລາວທີ່ໄດ້ປະກອບສ່ວນເຂົ້າໃນພາລະກິດການພັດທະນາເສດຖະກິດ-ສັງຄົມ ຂອງປະເທດຂອງຕົນໃຫ້ມີ ຄວາມ ຈະເລີນເຕີບໂຕ ແລະ ທ່ານ ຍັງໄດ້ເນັ້ນຕື່ມເຖິງແນວທາງນະໂຍບາຍຂອງພັກ ແລະ ລັດຖະບານລາວທີ່ຍາມໃດກໍໄດ້ໃຫ້ຄວາມສຳຄັນ ແລະ ເອົາໃຈໃສ່ສ້າງເງື່ອນໄຂໃຫ້ແກ່ ແມ່ຍິງລາວໄດ້ເຂົ້າຮ່ວມໃນການພັດທະນາເສດຖະກິດຂອງຊາດໂດຍໄດ້ກຳນົດໄວ້ໃນລັດຖະທຳມະນູນ, ກົດໝາຍຂອງ ສປປ. ລາວ ກ່ຽວກັບຄວາມສະເໝີພາບ ຍິງ-ຊາຍ ການ ປະກອບສ່ວນຂອງແມ່ຍິງລາວ ເຂົ້າໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ແຫ່ງຊາດຄັ້ງທີ່ VII (2011-2015) ແລະ ບົດບາດສຳຄັນຂອງ ແມ່ຍິງລາວ ໃນຂົງເຂດເສດຖະກິດຂອງ ສປປ. ລາວ ທີ່ແມ່ຍິງກວມເອົາ 52% ຂອງກຳລັງແຮງງານທັງໝົດ.

ນອກຈາກນີ້, ທ່ານ ດຣ. ນາງ ແກ້ວສາຍໃຈ ໄຊຍະສອນ ພ້ອມຄະນະ ຍັງໄດ້ເຄື່ອນໄຫວເຂົ້າຮ່ວມໃນລາຍການຕ່າງໆຂອງກອງປະຊຸມ ແລະ ໃນວັນທີ 6 ມິຖຸນາ 2013 ທ່ານ ກໍໄດ້ພົບປະກັບ ທ່ານ ນາງ Datin Paduka Rosmah Mansor, ພັນລະຍາຂອງທ່ານ ນາຍົກລັດຖະມົນຕີ ແຫ່ງມາເລເຊຍ. ນອກນັ້ນ, ທ່ານ ກໍໄດ້ພົບປະສອງຝ່າຍກັບ ທ່ານ ນາງ ຫງວຽນທິ ຢວນ ຮອງປະທານປະເທດ ແຫ່ງ ສສ. ຫວຽດນາມ ທັງເປັນຫົວໜ້າຄະນະຜູ້ແທນຫວຽດນາມ ເພື່ອຮັດແໜ້ນສາຍພົວພັນມິດຕະພາບ ແລະ ຄວາມສາມັກຄີພິເສດ ລະຫວ່າງ ສປປ. ລາວ ແລະ ສສ. ຫວຽດນາມ.

ຮ່ວມຕິດຕາມຄະນະຜູ້ແທນລາວໃນຄັ້ງນີ້, ຍັງມີ ທ່ານ ນາງ ສີໃສ ລືເດດມູນສອນ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ພ້ອມຄະນະ ຊຶ່ງໄດ້ເຂົ້າຮ່ວມ ກອງປະຊຸມສະເພາະຂັ້ນ ລັດຖະມົນຕີ ໃນຫົວຂໍ້: ຄູ່ຮ່ວມໃນຂະແໜງການເອກະຊົນ ຫຼື ມວນຊົນໃນການສົ່ງເສີມກາລະໂອກາດທາງດ້ານເສດຖະ ກິດໃຫ້ແກ່ແມ່ຍິງ ແລະ ເດັກຍິງ ກອງປະຊຸມດັ່ງກ່າວໄດ້ແລກປ່ຽນບົດຮຽນຫຼາຍບັນຫາໂດຍສະເພາະປະສົບການ, ຂໍ້ຫຍຸ້ງຍາກ, ສິ່ງທ້າທາຍໃນການພັດທະນາ, ປົກປ້ອງສິດຜົນປະໂຫຍດອັນຊອບທຳ ຂອງແມ່ຍິງ ແລະ ເດັກນ້ອຍ ໂດຍສະເພາະດ້ານເສດຖະກິດ.

ກອງປະຊຸມດັ່ງກ່າວ, ໄດ້ດຳເນີນໄປດ້ວຍຜົນສຳເລັດອັນຈົບງາມ ໂດຍການເຂົ້າຮ່ວມຂອງຄະນະຜູ້ແທນ ທັງໝົດ 1,100 ຄົນ ທີ່ມາຈາກ 72 ປະເທດໃນທົ່ວໂລກ./.

 

ຂໍຂອບໃຈຂ່າວຈາກ http://www.ecom.org.la