ຫລຸດ! Acer Iconia W3 ແທັບເລັດ ຂະຫນາດ 8 ນິ້ວ ມາພ້ອມ Windows 8

 ໃນໄລ­ຍະນີ້ກະ­ແສຂອງແທັບເລັດ Windows 8 ຖືໄດ້ວ່າມາແຮງທີ່ສຸດສໍາລັບປີນີ້ ແລະ ມີຜູ້ຜະລິດຫລາຍລາຍເລີ່ມຫັນມາເຮັດແທັບເລັດທີ່ແລ່ນດ້ວຍລະ­ບົບປະຕິບັດການ Windows 8 ອອກມາວາງຈໍາ­ຫນ່າຍ ເຊິ່ງໃນນັ້ນມີຜູ້ຜະລິດລາຍໃຫຍ່ອີກຫນຶ່ງລາຍນັ້ນກໍ່ຄືເອເຊີ (Acer) ທີ່ກຽມອອກແທັບເລັດຮຸ່ນໃຫມ່ທີ່ໃຊ້ລະ­ບົບປະ­ຕິ­ບັດການນີ້ອີກເຊັ່ນກັນ, ຫລ້າສຸດມີຂ່າວຫລຸດອອກມາຈາກເວັບໄຊ Minimachines ໄດ້ເປີດ­ເຜີຍ ພາບກ່ຽວກັບແທັບເລັດຮຸ່ນໃຫມ່ຂອງ Acer ທີ່ໃຊ້ຊື່ຮຸ່ນວ່າ Iconia W3 ມາພ້ອມກັບລະ­ບົບປະ­ຕິບັດການ Windows 8.

   ຈາກຂໍ້ມູນດັ່ງ­ກ່າວຖືວ່າຍັງມີລາຍລະ­ອຽດກ່ຽວກັບແທັບເລັດ Iconia W3 ໂດຍມີພຽງຄຸນລັກສະນະເບື້ອງຕົ້ນບອກວ່າຈະມາພ້ອມກັບຫນ້າຈໍຂະ­ຫນາດ 8 ນິ້ວ ມີຄວາມລະ­ອຽດ 1280x768 ພິກເຊລ ພ້ອມຄ່າຄວາມຫນາແຫນ້ນເມັດພິກເຊລຢູ່ທີ່ 187 ppi ໃຊ້ຊີພີຢູ Intel Atom ຮຸ່ນ Z2760 ຄວາມໄວ 1.8 GHz, ກຣາຟິກກາຣ໌ດ Intel Graphic Media Accelerator 3650, ຫນ່ວຍຄວາມຈໍາແຣມ 2GB, ຫນ່ວຍ ຄວາມຈໍາຕົວເຄື່ອງຂະ­ຫນາດ  64 GB ແບບ eMMC ແລະ ຫນ້າຈະຮອງຮັບຫນ່ວຍຄວາມຈໍາ microSD ພາຍນອກເພີ່ມເຕີມໄດ້, ເຊື່ອມຕໍ່ຜ່ານ Wi-Fi, Bluetooth 4.0, ສ່ວນແບັດເຕີຣີບໍ່ເຜີຍຄວາມຈຸອອກມາ ແຕ່ທາງເອເຊີກ່າວວ່າຈະໃຊ້ວຽກຕໍ່ເນື່ອງໄດ້ກວ່າ 8 ຊົ່ວ­ໂມງ, ທາງດ້ານຕົວເຄື່ອງມີຂະ­ຫນາດນ້ອຍສາ­ມາດຖືໄດ້ດ້ວຍມືດຽວມີກ້ອງດ້ານຫນ້າ ແລະ ຫລັງ, ນອກ­ຈາກຕົວແທັບເລັດແລ້ວຍັງມີອຸ­ປະ­ກອນເສີມທີ່ເປັນ Cover ສໍາ­ລັບໃຊ້ເປັນຂາຕັ້ງໃນຕົວລວມໄປເຖິງຊຸດຄີບອດເສີມທີ່ມີຂະ­ຫນາດໃຫຍ່ກວ່າຕົວແທັບເລັດຊ່ວຍເພີ່ມຄວາມສະ­ດວກໃນການພິມຂໍ້­ຄວາມ ຫລື ວຽກເອກະສານຕ່າງໆ.

   ຢ່າງ­ໃດກໍ່ຕາມ ທາງແຫລ່ງຂ່າວໄດ້ເປີດ­ເຜີຍວ່າເອເຊີຫນ້າຈະເປີດຕົວແທັບເລັດ  Iconia W3 ແລະ ສົ່ງລົງສູ່ຕະ­ຫລາດໃນເດືອນກັນ­ຍາປີນີ້ ສ່ວນເລື່ອງລາ­ຄາຍັງບໍ່ມີຂໍ້ມູນ, ສໍາ­ລັບທ່ານໃດທີ່ສົນ­ໃຈແທັບເລັດ Windows 8 ຂະຫນາດນ້ອຍພົກພາສະ­ດວກຄືກັນກັບຮຸ່ນນີ້ ທາງຄໍລໍາຜ່າໂລກໄອທີຈະນໍາສະ­ເຫນີໃຫ້ທ່ານຜູ້ອ່ານໄດ້ຕິດ­ຕາມກັນອີກພາຍ­ຫລັງ.

ຂໍຂອບໃຈຂ່າວຈາກ http://www.ecom.org.la