ສະຫະລັດຯ ລົງນາມມອບເງິນຊ່ອຍເຫລືອລ້າແກ່ ສປປ ລາວ ເພື່ອແກ້ບັນຫາຢາເສບຕິດ

165

ລັດຖະບານສະຫະລັດອະເມຣິກາໄດ້ຕົກລົງໃຫ້ການຊ່ອຍເຫລືອລ້າແກ່ລັດຖະບານ
ສປປ.ລາວ ຕື່ມອີກ 3 ແສນໂດລາສະຫະລັດ ເພື່ອນໍາໃຊ້ເຂົ້າໃນການປະຕິບັດ
ມາດຕະການທາງດ້ານກົດໝາຍຄວບຄຸມຢາເສບຕິດ ໃນຂອບເຂດທົ່ວປະເທດ
ສົກປີ 2013-2014. ທ່ານ ກຸ ຈັນສີນາ ຮັກສາການຄະນະກໍາມະການ
ແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ ຊຶ່ງຕາງໜ້າໃຫ້ແກ່
ລັດຖະບານລາວ ໄດ້ສະແດງຄວາມຂອບໃຈຕໍ່ການຊ່ອຍເຫລືອອັນລໍ້າຄ່າ
ຂອງລັດຖະບານສະຫະລັດ ຈໍານວນ 3 ແສນໂດລາສະຫະລັດໃນຄັ້ງນີ້
ພາຍຫລັງທີ່ກ່ອນໜ້ານີ້ໄດ້ຊ່ອຍເຫລືອໄປແລ້ວ 150.000 ໂດລາ ຊຶ່ງຖືວ່າ
ໄດ້ເປັນການປະກອບສ່ວນອັນສໍາຄັນ ເພື່ອນໍາໄປສົມທົບທຶນຂອງລັດຖະບານ
ສປປ.ລາວ ນໍາໃຊ້ເຂົ້າໃນການປະຕິບັດແຜນສະກັດກັ້ນ ແລະ ແກ້ໄຂບັນຫາ
ຢາເສບຕິດປະຈໍາສົກປີໜ້າ ໂດຍສະເພາະການເຝິກອົບຮົມ ຍົກລະດັບຄວາມຮູ້
ສ້າງຂີດຄວາມສາມາດໃຫ້ແກ່ເຈົ້າໜ້າທີ່ທີ່ປະຕິບັດກົດໝາຍ ພ້ອມນັ້ນກໍປະກອບ
ຍານພາຫະນະ ແລະ ອຸປະກອນທີ່ຈໍາເປັນຈໍານວນໜຶ່ງ ສໍາລັບອໍານວຍຄວາມ
ສະດວກໃຫ້ເຈົ້າໜ້າທີ່ຢູ່ທ້ອງຖິ່ນຕ່າງໆ ເພື່ອສະກັດ ແລະ ຄວບຄຸມຢາເສບຕິດ
ໃຫ້ມີປະສິດທິຜົນກວ່າເກົ່າ.
ພິທີລົງນາມໃນສັນຍາດັ່ງກ່າວ ໄດ້ຈັດຂຶ້ນໃນວັນທີ 30 ສິງຫາ 2013 ຢູ່ທີ່
ຫ້ອງວ່າການລັດຖະບານ ລະຫວ່າງທ່ານ ກຸ ຈັນສີນາ ຮັກສາການຄະນະ
ກໍາມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ ແລະ ທ່ານ
ພໍ ເມເຢີ (Paul Mayer) ອຸປະທູດສະຫະລັດ ອະເມຣິກາ ປະຈໍາ
ສປປ.ລາວ ພ້ອມດ້ວຍເຈົ້າໜ້າທີ່ຂັ້ນສູງຂອງສອງຝ່າຍເຂົ້າຮ່ວມເປັນສັກຂີ.

ຂອຂອບໃຈຂ່າວຈາກ http://www.vtetoday.la

ແກ້ໄຂລ່າສຸດ (ມື້ພະຫັດທີ່ 05 ກັນຍາ 2013 ເວລາ 05: 52)