ທີມບານສົ່ງຊາຍ ແລະ ຍິງ ກອງທັບ ຄວ້າແຊມ ກິລາບານສົ່ງ ປະຈຳປີ 2013

ເພື່ອເປັນການສ້າງ ແລະ ຊຸກຍູ້ຂະບວນການກິລາບານສົ່ງໃຫ້ຍືນຍົງ ແລະ
ພັດທະນາໄປຕາມທິດທາງວາງໄວ້ ທັງເປັນການສ້າງຄູເຝິກ, ກຳມະການ
ຕັດສິນ ແລະ ນັກກິລາ ໃຫ້ມີຄຸນນະພາບ ກ້າວເຂົ້າສູ່ລະດັບສາກົນ ທັງເປັນ
ການທົດສອບ ແລະ ກະກຽມນັກກິລາ ເພື່ອຮອງຮັບການເຂົ້າຮ່ວມແຂ່ງຂັນ
ໃນງານມະຫະກຳ ກິລາຊີເກມ ຄັ້ງທີ 27 ທີ່ປະເທດມຽນມາເປັນເຈົ້າພາບ
ໃນທ້າຍປີນີ້. ພາຍຫລັງໄດ້ດຳເນີນການແຂ່ງຂັນກິລາບານສົ່ງທົ່ວປະເທດ
ປະຈຳປີ 2013 ຊິງຂັນ ລັດຖະມົນຕີວ່າການກະຊວງສຶກສາທິການ ແລະ
ກິລາ ມາແຕ່ວັນທີ 30 ສິງຫາ ເຖິງວັນທີ 5 ກັນຍາ 2013 ເປັນເວລາ
7 ວັນ ຊຶ່ງມີທີມນັກກິລາບານສົ່ງຈາກທົ່ວປະເທດເຂົ້າຮ່ວມແຂ່ງຂັນທັງໝົດ
14 ທີມ ໃນນັ້ນມີ 6 ທີມຍິງ ແລະ 8 ທີມຊາຍ ຊຶ່ງຜົນຂອງການແຂ່ງຂັນ
ປະກົດວ່າ ປະເພດທີມຍິງຊະນະເລີດ ໄດ້ແກ່ທີມກອງທັບ ໄດ້ຮັບຂັນລາງວັນ
1 ໜ່ວຍ ພ້ອມເງິນສົດ 4 ລ້ານກີບ, ອັນດັບ 2 ໄດ້ແກ່ ທີມທະນາຄານ
ໄດ້ຮັບຂັນ 1 ໜ່ວຍ ພ້ອມເງິນສົດ 3 ລ້ານກີບ ແລະ ອັນດັບ 3 ແມ່ນ
ທີມ ປກສ ໄດ້ຮັບຂັນ 1 ໜ່ວຍ ພ້ອມເງິນສົດ 2 ລ້ານກີບ, ສ່ວນປະເພດ
ທີມຊາຍຊະນະເລີດ ໄດ້ແກ່ ທີມກອງທັບ ໄດ້ຮັບຂັນລາງວັນ 1 ໜ່ວຍ
ພ້ອມເງິນສົດ 6 ລ້ານກີບ ອັນດັບ 2 ໄດ້ແກ່ທີມ ປກສ ໄດ້ຮັບຂັນ 1 ໜ່ວຍ
ພ້ອມເງິນສົດ 5 ລ້ານກີບ ແລະ ອັນດັບ 3 ແມ່ນທີມ ລວມດາວ ໄດ້ຮັບຂັນ
1 ໜ່ວຍ ພ້ອມເງິນສົດ 4 ລ້ານກີບ.

ທີມກອງທັບ ຄອງຂັນຊະນະເລີດບານສົ່ງ(ຊາຍ) ໃນການແຂ່ງຂັນກິລາບານສົ່ງ
ທົ່ວປະເທດ ຊີງຂັນ ລມຕ ກະຊວງສຶກສາທິການ ແລະ ກິລາ ປະຈໍາປີ 2013

ພິທີອັດການແຂ່ງຂັນໄດ້ຈັດຂື້ນໃນຕອນຄ່ຳຂອງວັນທີ 5 ກັນຍາ 2013 ຢູ່ທີ່
ສະໜາມກິລາໃນຮົ່ມບຶງຂະຫຍອງ ເມືອງສີສັດຕະນາກ ນະຄອນຫລວງວຽງຈັນ
ໂດຍການເຂົ້າຮ່ວມ ແລະ ມອບລາງວັນຂອງທ່ານ ບົວລານ ສິລິປັນຍາ
ລັດຖະມົນຕີຊ່ອຍວ່າ ການກະຊວງສຶກສາທິການ ແລະ ກິລາ ພ້ອມນັ້ນກໍມີ
ທ່ານ ແພງສະຫງວນ ຈຸນລະມະນີ ປະທານສະຫະພັນກິລາບານສົ່ງແຫ່ງຊາດ
ພ້ອມດ້ວຍຜູ້ອຸປະຖຳ ແລະ ມວນຊົນຊາວນະຄອນຫລວງວຽງຈັນເຂົ້າຮ່ວມ.

ຂອຂອບໃຈຂ່າວຈາກ http://www.vtetoday.la