ຂໍ້ມູນທົ່ວໄປຂອງແຂວງຈໍາປາສັກແລະເມືອງປາກເຊ

ແຂວງຈໍາປາສັກ

ແຂວງຈຳປາສັກ (ອັງກິດChampasak) ເປັນແຂວງຫນຶ່ງຂອງປະເທດລາວທີ່ຕັ້ງຢູ່ທາງທິດໃຕ້ຂອງປະເທດ ເປັນແຂວງສຳຄັນທາງພາກໃຕ້ມາຕັ້ງແຕ່ສະໃໝບູຮານ ເປັນທີ່ຕັ້ງຂອງອານາຈັກຈຳປາສັກ ເຄີຍຢູ່ໃນເຂດອານາຈັກຂອມບູຮານ ແຂວງນີ້ເປັນທີ່ຕັ້ງຂອງມໍລະດົກໂລກ ຜາສາດຫິນວັດພູ



ປະຫວັດແຂວງຈຳປາສັກ

ໃນສະໃໝກ່ອນຝຣັ່ງຍຶດຄອງ ເມືອງເອກຂອງແຂວງນີ້ຄື ເມືອງຈຳປາສັກ ຕັ້ງຢູ່ທາງຝັ່ງຂວາຂອງແມ່ນ້ຳຂອງ ແຕ່ຫຼັງຈາກຝຣັ່ງໄດ້ເຂົ້າມາຍຶດຄອງປະເທດລາວແລ້ວ ກໍຍ້າຍເມືອງເອກໄປທີ່ປາກເຊ ຊຶ່ງຢູ່ທາງເໜືອຈາກ ຈຳປາສັກ ໄປ 30 ກິໂລແມັດ ແລະ ຢູ່ທາງຝັ່ງຊ້າຍແມ່ນ້ຳຂອງ ແຂວງຈຳປາສັກນີ້ເປັນທີ່ຕັ້ງຂອງສຸດຍອດທຳມະຊາດຂອງປະເທດລາວ ເຊ່ັນ ນ້ຳຕົກຄາດຄອນພະເພັງ ນ້ຳຕົກຕາດຜາສ້ວມນ້ຳຕົກຫຼີ່ຜີ ເຂດຕິດຕໍ່ຂອງແຂວງນີ້ ທາງຕະເວັນຕົກສາມາດຂ້າມໄປປະເທດໄທທາງດ່ານຊ່ອງເມັກໄດ້ ແລະ ທາງໃຕ້ ຍັງສາມາດຂ້າມໄປກັມປູເຈຍທາງເວີນຄາມໄດ້ອີກດ້ວຍ

ທີ່ຕັ້ງ

  • ທິດເໜືອຕິດກັບ ແຂວງສາລະວັນ
  • ທິດໃຕ້ຕິດກັບ ແຂວງຊຽງແຕງ(ສະຕຶງແຕຣງ) ແລະ ເພຍວິເຮຍ ຂອງ ຣາຊະອານາຈັກກຳປູເຈຍ
  • ທິດຕາເວັນອອກຕິດກັບ ແຂວງອັດຕະປື ແລະ ແຂວງເຊກອງ
  • ທິດຕາເວັນຕົກຕິດກັບ ແຂວງອຸບົນຣາຊະທານີ ຂອງ ຣາຊະອານາຈັກໄທ

ບັນດາເມືອງ

ແຂວງຈຳປາສັກປະກອບດ້ວຍ 10 ເມືອງຄື:

  1. 16-01 ປາກເຊ (Pakse)
  2. 16-02 ຊະນະສົມບູນ (Sanasomboun)
  3. 16-03 ບາຈຽງຈະເລີນສຸກ (Ba Chiengchaleunsouk)
  4. 16-04 ປາກຊ່ອງ (Paksong)
  5. 16-05 ປະທຸມພອນ (Pathoumphone)
  6. 16-06 ໂພນທອງ (Phonthong)
  7. 16-07 ຈຳປາສັກ (Champassak)
  8. 16-08 ສຸຂຸມາ (Soukhouma)
  9. 16-09 ມູນລະປະໂມກ (Meunlapamok)
  10. 16-10 ໂຂງ (Khong)

ສະຖານທີ່ທ່ອງທ່ຽວ


ເມືອງປາກເຊ

ເມືອງປາເຊ (Pakse District) ເປັນເມືອງເອກຂອງ ແຂວງຈໍາປາສັກ (Champasak Province), ຕັ້ງກວມເອົາປາກເຊໂດນທີ່ປ່ອງໃສ່ແມ່ນໍ້າຂອງ, ມີເນື້ອທີ່ທັງໝົດປະມານ 180 ກມ2, ມີຄວາມຍາແຕ່ທິດເໜືອຫາໃຕ້ແມ່ນ 15 ກມ ແລະ ທິດຕາເວັນອອກຫາຕາເວັນຕົກແມ່ນ 15 ກມ, ແລະ ມີປະຊາກອນທັງໝົດ 87,000 ຄົນ (ໃນປີ 2009). ທິດເໜືອຕິດກັບເມືອງຊະນະສົມບູນ, ທິດຕາເວັນອອກຕິດກັບເມືອງບາຈຽງຈະເລີນສຸກ, ທິດໃຕ້ ແລະ ຕາເວັນຕົກຕິດກັບແມ່ນໍ້າຂອງເຊິ່ງກົງກັນຂ້າມກັບເມືອງໂພນທອງ.

ເມືອງປາເຊ ໄດ້ຖືກສ້າງຕັ້ງຂຶ້ນໃນປີ ຄສ 1909 ໂດຍຈັກກະພັດຝຣັ່ງ ແລະ ໄດ້ຖືກແຕ່ງຕັ້ງໃຫ້ເປັນເມືອງເອກຂອງແຂວງຈໍາປາສັກໃນປີຕໍ່ມາ ໂດຍປ່ຽນແທນເມືອງໂພນທອງ ແລະ ເມືອງຈໍາປາສັກ.

ເມືອງປາເຊ ປະກອບມີ 50 ບ້ານ, ເຊິ່ງບ້ານທີ່ໃຫຍ່ທີ່ສຸດແມ່ນບ້ານຊົ້ງ.

ສະຖານທີ່ທ່ອງທ່ຽວທີ່ໜ້າສົນໃຈ ແລະ ໂດ່ງດັງຂອງເມືອງແມ່ ອາດີພະລາຊາວັງຂອງ ສະເດັດບຸນອູ້ມ ນະຈໍາປາສັກ (ໂຮງແຮມຈໍາປາສັກພາເລດສ໌), ວັດພະບາດ, ວັດຫຼວງ, ບ້ານແກ້ວສໍາພັນ ແລະ ແຄມຂອງ. ພະລາດສະວັງສະເດັດບຸນອູ້ມ ເລີ່ມກໍ່ສ້າງໃນປີ ຄສ 1963 ແລະ ສໍາເລັດໃນປີ 1965 ແລະ ເປັນພະລາຊາວັງທີ່ໃຫຍ່ທີ່ສຸດໃນປະຫວັດສາດຂອງ ປະເທດລາວທີ່ເຄີຍມີມາຈົນຮອດປະຈຸບັນ. ວັດພະບາດເປັນວັດເກົ່າແກ່ທີ່ສຸດຂອງ ເມືອງປາກເຊ ເຊິ່ງມີອາຍຸໄດ້ 110 ປີແລ້ວ ແລະ ມີຮ່ອງຮອຍພະພາດຂອງພະພຸດທະເຈົ້າ. ວັດຫຼວງເປັນວັດທີ່ເກົ່າແກ່ເປັນອັນດັບສອງ ແຕ່ວ່າມີສະຖາປັດຕະຍາກໍາອັນສວຍງາມ ແລະ ເປັນສະຖານທີ່ຕັ້ງຂອງໂຮງຮຽນສົງທີ່ໃຫຍ່ທີ່ສຸດຂອງແຂວງຈໍາປາສັກ. ບ້ານແກ້ວສໍາພັນເປັນບ້ານທີ່ຕັ້ງຂອງ ຕະຫຼາດທີ່ເກົ່າແກ່ທີ່ສຸດຂອງເມືອງປາເຊທີ່ຍັງຫຼົງເຫືອຢູ່ນັ້ນຄື ຕະຫຼາດແລງຫຼັກ 2 ແລະ ເຄີຍເປັນທີ່ຕັ້ງຄ້າຍທະຫານຂອງຈັກກະພັດຝຣັງໃນສະໃໝລາວເປັນເມືອງຂຶ້ນ ພ້ອມທັງມີທິວທັດທົ່ງນາທີ່ສວຍງານ. ແຄມຂອງເມືອງປາກເຊເປັນສະຖານທີ່ຍອດນິຍົມທີ່ສຸດຂອງຄົນເມືອງປາເຊ ແລະ ທຸກໆແລງຂອງທຸກໆມື້ ຄົນປາກເຊຈະປາກັນຫຼັ່ງໄຫຼໄປຫຼິນນັ່ງຕາກລົມ, ຍ່າງໂອລົມ, ເປັນຈຸດນັດພົບອັນສໍາຄັນ, ຊົມທິວທັດຂອງຟາກຂອງເມືອງໂພນທອງ ແລະ ພູສະເຫຼົ້າ, ແລະ ຊົມຕາເວັນຕົກລັບຂອບຟ້າປົນກັບສາຍນໍ້າຂອງອັນສວຍງານ.

ກຸຫຼາບປາກເຊ

ປາກເຊດິນແດນທີ່ຖືກຂະໜານນາມວ່າ ແດນອູ່ເຂົ້າອູ່ປາຕອນໃຕ້ສຸດຂອງລາວເຮົາ. ປາກເຊເປັນ ເມືອງເອກ ຂອງແຂວງຈຳປາສັກທີ່ຕັ້ງຢູ່ລຽບຕາມແຄມແມ່ນ້ຳຂອງ ແລະ ແມ່ນ້ຳເຊໂດນທີ່ໄຫຼມາຈາກຝາກຝັ່ງທາງແຂວງສາລະວັນ ບ່ອນທີ່ແມ່ນ້ຳທັງສອງໄຫຼມາບັນຈົບກັນນັ້ນເອີ້ນວ່າ ສົບເຊ ແລະ ເປັນບ່ອນທີ່ນັກທ່ອງທ່ຽວຈາກພາຍໃນ ແລະ ຕ່າງປະເທດໃຝ່ຝັນຢາກໄປເຫັນ ເພາະວ່ານ້ຳຢູ່ສົບເຊ ຈະເປັນນ້ຳສອງສີທີ່ສອງແມ່ນ້ຳໄຫຼມາບັນຈົບກັນ, ໂດຍສະເພາະແມ່ນຍາມຕາເວັນໃກ້ຊິຕົກດິນແມ່ນມີຄວາມສວຍງາມທີ່ສຸດບວກກັບອາກາດອັນເຢັນສະບາຍເໝາະແກ່ການນັ່ງກິນລົມຊົມວິວແລະຖ່າຍຮູບເປັນຢ່າງຍິ່ງ. ເນື່ອງຈາກສະໄໝກ່ອນ ສປປ ລາວຂອງເຮົາຕົກຢູ່ພາຍໃຕ້ອານານິຄົມຂອງຝຣັ່ງ ເຊັ່ນດຽວກັບປາກເຊທີ່ເຄີຍເປັນເມືອງຍຸດທະສາດທິ່ສຳຄັນແລະ ເປັນສູນກາງການບັນຊາການໃນເຂດພາກໄຕ້ລາວຂອງຝຣັ່ງໃນສະໃໝນັ້ນ ຈິ່ງເຮັດໃຫ້ປາກເຊປັດຈຸບັນນີ້ ຍັງມີອະຣິຍະທຳແບບເອີຣົບຫຼົງເຫຼືອຢູ່ ເປັນຕົ້ນແມ່ນຕຶກອາຄານເກົ່າແກ່ຕ່າງໆ ທີ່ເວົ້າໄດ້ວ່າເປັນສະເໜ່ໜຶ່ງໃຫ້ແກ່ຜູ້ມາພົບເຫັນ, ຍ້ອນຄວາມເປັນເອກະລັກ ແລະ ສວຍງາມແບບຄຼາດຊິກ ຂອງເມືອງປາກເຊນີ້ເອງ ຈິ່ງຖືກເລືອກໃຫ້ເປັນສະຖານທີ່ຖ່າຍທຳສາກ ສຳຄັນໆ ໃນຮູບເງົາເລື່ອງ ”ສະບາຍດີຫຼວງພະບາງ” ທີ່ໂດ່ງດັງໃນປີທີ່ຜ່ານມາ, ນອກຈາກຕຶກອາຄານເກົ່າແກ່ທີ່ສວຍງາມແລ້ວປາກເຊຍັງມີສະເໜ່ໜຶ່ງອີກຄືອາຫານການກິນທີ່ຍັງຄົງຄວາມເປັນພາກໃຕ້ໄວ້ໄດ້ດີທີ່ສຸດນັ້ນກໍຄື ອາຫານເມນູທີ່ກ່ຽວກັບປາ ຖ້າທ່ານຢາກກິນສົ້ມ ຫຼື ກ້ອຍປານ້ຳຂອງແບບເອກະລັກພາກໃຕ້ແທ້ໆ ລອງໄປທ່ຽວປາກເຊແລ້ວທ່ານຈະໄດ້ສຳຜັດກັບລົດຊາດທີ່ແທ້ຈິງ. ບັນຍາກາດໃນຕອນຄ່ຳຄືນຂອງປາກເຊ ກໍເຕັມໄປດ້ວຍແສງສີທີ່ມີການປະດັບປະດາທີ່ສວຍງາມ, ຖ້າທ່ານຜູ້ອ່ານຢາກສຳຜັດກັບບັນຍາກາດໃນຍາມຄ່ຳຄືນທີ່ແຄມຂອງກໍໜ້າສົນໃຈບໍ່ແພ້ກັນເພາະວ່າເປັນບ່ອນທີ່ທຸກຄົນໄປພັກຜ່ອນຢ່ອນໃຈ, ນອກຈາກນັ້ນອອ້ມແອ້ມເມືອງປາກເຊຍັງມີສະຖານທີ່ທ່ອງທ່ຽວທາງດ້ານທຳມະຊາດຫຼາຍບ່ອນທີ່ໜ້າສົນໃຈເປັນຕົ້ນແມ່ນນ້ຳຕົກຕາດເຊັ່ນ: ນ້ຳຕົກຕາດຜາສວ້ມທີ່ຢູ່ຫ່າງຈາກຕົວເມືອງປາກເຊປະມານ 40 ກມເທົ່ານັ້ນນອກຈາກນັ້ນຍັງມີຕາດຟານ,ຕາດເຍືອງແລະບ່ອນອື່ນໆອີກ... ນອກຈາກນັ້ນຖ້າທ່ານຕ້ອງການເບິ່ງຜ້າໃໝແດນໃຕ້ທ່ານກໍສາມາດໄປເບິ່ງໄດ້ທີ່ບ້ານສະຜ່າຍເຊິ່ງເປັນບ່ອນປູກມອນລຽ້ງມ້ອນທີ່ມີຊື່ສຽງຂອງເຂດໃຕ້ລາວ ທີ່ຢູ່ຫ່າງຈາກຕົວເມືອງປາກເຊປະມານ 10 ກວ່າກິໂລແມັດເທົ່ານັ້ນ. ຖ້າຫາກວ່າທ່ານຕ້ອງການຢາກຊື້ເຄື່ອງປະດັບຫຼືເຄື່ອງຫັດຖະກຳກໍສາມາດເຂົ້າໄປຫາເລືອກຊື້ໄດ້ທີ່ຕະຫຼາດດາວເຮືອງເຊິ່ງເປັນບ່ອນທີ່ນັກທ່ອງທ່ຽວຕ່າງປະເທດນິຍົມກັນໄປທີ່ສຸດ

(ໂດຍສະເພາະແມ່ນນັກທ່ອງທ່ຽວຈາກໄທ) ເພາະວ່າເຄື່ອງມີຫຼາກຫຼາຍປະເພດໃຫ້ເລືອກແລະລາຄາຖືກ ບວກກັບນ້ຳໃຈຂອງຊາວເມືອງປາກເຊທີ່ຍິນດີຕ້ອນຮັບແຂກບ້ານແຂກບ້ານເມືອງແລະເອື້້ອເຟື້ອເພື່ອແຜ່ ຈົນໄດ້ສາຍາວ່າ ”ໄທໃຕ້ພີ່ນ້ອງຫຼາຍ” ກຸຫຼາບປາກເຊ ຄືຊື່ເພງທີ່ຮ້ອງເພື່ອສັນລະເສີນ ແລະຍ້ອງຍໍຄວາມງົດງາມຂອງດິນແດນແຫ່ງນີ້ ກໍຄືນຳໃຈຂອງສາວເມືອງປາກເຊທີ່ຈະບໍ່ມີວັນເຫືອດແຫ້ງໂດຍການໃຊ້ດອກກຸຫຼາບເພື່ອປຽບທຽບ.

1318148838

otherspics post 12769

 



ແກ້ໄຂລ່າສຸດ (ມື້ພຸດທີ່ 04 ກັນຍາ 2013 ເວລາ 07: 38)