ປະທານ​ສະພາ​ແຫ່ງ​ຣາຊະ​ອານາຈັກ​ກຳປູ​ເຈຍ​ຢ້ຽມຢາມ​ແຂວງ​ຈຳປາ​ສັກ

ສົມເດັດອັກຄະມະຫາ ໂປເຢຍຈັກກຣີ ເຮັງຊຳຣິນ ປະທານສະພາແຫ່ງຊາດ ແຫ່ງຣາຊະອານາຈັກກຳປູເຈຍ ພ້ອມພັນລະຍາ ແລະ ຄະນະໄດ້ເດີນທາງມາຢ້ຽມຢາມສັນຖະວະໄມຕີ ທີ່ແຂວງຈຳປາສັກໃນວັນທີ 28-30 ກໍລະກົດ 2012 ນີ້ ໂດຍການຕ້ອນຮັບຂອງ ທ່ານດຣ. ສອນໄຊ ສີພັນດອນ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ພ້ອມຄະນະ.

ໃນໂອກາດດັ່ງກ່າວປະທານສະພາແຫ່ງຊາດແຫ່ງຣາຊະອານາຈັກກຳປູເຈຍ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງການນຳຂັ້ນສູງຂອງແຂວງ, ທ່ານໄດ້ອວຍພອນ ໃຫ້ສາຍພົວພັນມິດຕະພາບ, ຄວາມສາມັກຄີລະຫວ່າງສອງຊາດ ກໍ່ຄືແຂວງຈຳປາສັກໃຫ້ນັບມື້ນັບເຂັ້ມແຂງ; ພ້ອມນັ້ນທ່ານ ດຣ. ສອນໄຊ ສີພັນດອນ ກໍ່ໄດ້ຕີລາຄາສູງຕໍ່ ການມາຢ້ຽມຢາມດັ່ງກ່າວ ທີ່ເປັນການເສີມຂະຫຍາຍສາຍພົວພັນການຮ່ວມມື ລະຫວ່າງສອງພັກ-ສອງລັດ ເວົ້າລວມ, ເວົ້າສະເພາະແຂວງຈຳປາສັກກັບຣາຊະອານາຈັກກຳປູເຈຍ ໃຫ້ແໜ້ນແຟ້ນກວ່າເກົ່າ, ພ້ອມນັ້ນທ່ານກໍ່ໄດ້ລາຍງານສະພາບການພັດທະນາເສດຖະກິດ-ສັງຄົມ ແລະ ການຮ່ວມມືກັບບັນດາແຂວງຕ່າງໆຂອງຣາຊະອານາຈັກກຳປູເຈຍ ໂດຍສັງເຂບ ຕື່ມອີກ.

ການຢ້ຽມຢາມແຂວງຈຳປາສັກ ໃນເທື່ອນີ້ຄະນະຜູ້ແທນດັ່ງກ່າວໄດ້ເດີນທາງໄປຢ້ຽມຢາມໂຮງງານຜະລິດກາເຟດາວເຮືອງ, ໄປສະຖານທີ່ທ່ອງທ່ຽວວັດພູຈຳປາສັກ, ນ້ຳຕົກຕາດ ຜາສ້ວມ, ນ້ຳຕົກຕາດ ຄອນພະເພັງ ແລະ ຢ້ຽມຢາມພົບປະທານຄຳໄຕ ສີພັນດອນ ອະດີດປະທານພັກ ປະທານປະເທດແຫ່ງ ສປປ ລາວ ທີ່ເຮືອນພັກຫຼັກ 4 ພ້ອມນັ້ນ ທ່ານຍັງໄດ້ໂອ້ລົມ ແລະ ຍົກໃຫ້ເຫັນສາຍພົວພັນຮ່ວມມືຂອງສອງພັກສອງຊາດ ຍົກໃຫ້ເຫັນຄວາມສາມັກຄີຮັກແພງແຕ່ອະດີດຈົນຮອດປັດຈຸບັນ ໃຫ້ສືບຕໍ່ຮັດແໜ້ນ ຄວາມສາມັກຄີ ແລະ ພົວພັນຮ່ວມມືໃຫ້ແໜ້ນແຟ້ນຂຶ້ນກວ່າເກົ່າ.

ຂໍຂອບໃຈຂ່າວຈາກ http://www.kpl.net.la/

 

Add comment


Security code
Refresh