10 ປີ​ແຫ່ງ​ການ​ພັດທະນາ ​ແລະ ​ເຕີບ​ໃຫຍ່​ຂະຫຍາຍຕົວ​ຂອງ​ສະຫະພັນ​ນັກຮົບ​ເກົ່າ​ແຫ່ງ​ຊາດລາວ

(ຂປລ): ເພື່ອເປັນການຂ່ຳນັບຮັບຕ້ອນ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 10 ປີ (9/9/2002- 9/9/2012) ໃຫ້ມີຄວາມໝາຍ ຄວາມສຳຄັນ ອັນເລິກເຊິ່ງ ນັ້ນ ສະຫະພັນນັກຮົບເກົ່າແຫ່ງຊາດລາວ ໄດ້ຈັດພິທີຖະແຫລງຂ່າວ ກ່ຽວກັບວັນສ້າງຕັ້ງສະຫະພັນດັ່ງກ່າວຂຶ້ນ ໃນວັນທີ 17 ສິງຫາ 2012 ຢູ່ທີ່ສະຫະພັນນັກຮົບເກົ່າ ໃຫ້ກຽດຖະ ແຫລງ ໂດຍທ່ານ ພົນຈັດຕະວາ ສົມພອນ ແກ້ວມີໄຊ, ປະທານສະຫະພັນນັກຮົບເກົ່າແຫ່ງຊາດລາວ, ມີບັນດາຮອງປະທານ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ໃນໂອກາດນີ້ ທ່ານ ພ/ວ ສົມພອນ ແກ້ວມີໄຊ ໄດ້ຍົກໃຫ້ເຫັນຖິງປະຫວັດຄວາມເປັນມາ, ຜົນງານ ແລະ ໄຊຊະນະ, ທາດແທ້ປະຕິວັດ ຂອງນັກຮົບເກົ່າປະຕິວັດ ໃນໄລຍະຕໍ່ສູ້ກູ້ ຊາດ ຕ້ານຈັກກະພັດລ່າເມືອງຂຶ້ນເກົ່າ ແລະ ໃໝ່ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ຊຶ່ງບັນດາສະຫາຍນັກຮົບເກົ່າໃນປະຈຸບັນ ລ້ວນແຕ່ໄດ້ກຳເນີດ ຈາກກຳລັງປະກອບອາວຸດຂອງພັກ ທີ່ໄດ້ຜ່ານແປວໄຟແຫ່ງສົງຄາມ. ພ້ອມນີ້ ທ່ານຍັງໄດ້ຍົກໃຫ້ເຫັນປະຫວັດການສ້າງຕັ້ງ, ການຈັດຕັ້ງ, ການເຄື່ອນໄຫວພາລະບົດບາດສິດໜ້າທີ່ ຜົນງານການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງສະຫະພັນນັກຮົບເກົ່າແຫ່ງຊາດລາວ ໃນໄລຍະ 10 ປີຜ່ານມາ ເພື່ອໃຫ້ຄົນຮຸ່ນຫລັງ ໄດ້ກຳແໜ້ນວິລະກຳອັນລ້ຳເລີດ, ມູນ ເຊື້ອຜົນງານອັນໃຫຍ່ຫລວງຂອງບັນດາສະຫາຍນັກຮົບເກົ່າປະຕິວັດສ້າງໄວ້ ພ້ອມກັນນຳເອົາໄປເປັນບົດຮຽນ ໝູນໃຊ້ເຂົ້າໃນການປະຕິບັດໜ້າທີ່ວິຊາສະເພາະ ຢ່າງມີໝາກຜົນ./.

 

ຂໍຂອບໃຈຂ່າວຈາກ http://www.kpl.net.la/

ແກ້ໄຂລ່າສຸດ (ມື້ຈັນທີ່ 20 ສິງຫາ 2012 ເວລາ 04: 58)

 

Add comment


Security code
Refresh