ເປີດ​ສູນ​ການ​ຄ້າ​​ອາ​ຊຽນ ສະຫລອງ​ວັນ​ຢຶດອຳນາດ 23 ສິງຫາ 2012

(ຂປລ): ພິທີເປີດສູນການຄ້າອາຊຽນ ເພື່ອສະເຫລີມສະຫລອງວັນຢຶດອຳນາດ 23 ສິງຫາ ໄດ້ຈັດຂຶ້ນໃນວັນທີ 18 ສິງຫາ 2012 ຢູ່ທີ່ເມືອງໄຊເຊດຖາ, ນະຄອນຫລວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ບຸນຍັງ ວໍລະຈິດ, ຮອງປະທານປະເທດແຫ່ງ ສປປ ລາວ, ທ່ານ ສຸກັນ ມະຫາລາດ, ເຈົ້າຄອງນະຄອນຫລວງວຽງຈັນ, ທ່ານ ວິໄຊ ນະວຽງຈັນ, ເຈົ້າຂອງບໍລິສັດ ວີເອກພີ (VXP) ປະທານສູນການຄ້າອາຊຽນ, ມີບັນດາການນຳພັກ-ລັດ, ລັດຖະມົນຕີວ່າການ, ຊ່ວຍວ່າການ, ຫົວໜ້າກົມ, ຮອງກົມ ພ້ອມດ້ວຍບັນດາ ນັກທຸລະກິດ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ສາຍທອງ ແກ້ວດວງດີ, ຮອງເຈົ້າຄອງນະຄອນຫລວງວຽງຈັນ ໄດ້ກ່າວວ່າ: ການເປີດສູນການຄ້າຕະຫລາດອາຊຽນ, ງານວາງສະແດງ ແລະ ຂາຍສິນຄ້າ ໃນຄັ້ງນີ້ ແມ່ນເປັນຄັ້ງທຳອິດ ຂອງນະຄອນຫລວງວຽງຈັນ ເພື່ອສະເຫລີມສະຫລອງວັນຢຶດອຳນາດວັນທີ 23 ສິງຫາ ຄົບຮອບ 37 ປີ ຊຶ່ງສະແດງໃຫ້ເຫັນເຖິງຄວາມເຕີບໃຫຍ່ຂະ ຫຍາຍຕົວທາງດ້ານການພັດທະນາຊີວິດການເປັນຢູ່ ແລະ ດ້ານເສດຖະກິດ ຂອງຊາວນະຄອນຫລວງວຽງຈັນ ພາຍໃຕ້ການນຳພາຂອງພັກ ແລະ ລັດຖະບານ. ງານດັ່ງກ່າວຈະໄດ້ ດຳເນີນໄປແຕ່ວັນທີ 18-28 ສິງຫາ 2012 ເພື່ອແນໃສ່ການແລກປ່ຽນບົດຮຽນ ໃນການປຸງແຕ່ງອາຫານ ພ້ອມທັງຄັດເລືອກອາຫານທີ່ເປັນເອກະລັກຂອງນະຄອນຫລວງວຽງຈັນ ທີ່ມີລົດຊາດແຊບຖືກໃຈຜູ້ທີ່ມາທ່ຽວຊົມໃນງານ ແລະ ເຫັນໄດ້ຄວາມສວຍງາມຂອງການຕົບແຕ່ງຮ້ານຄ້າ, ຮ້ານອາຫານ ທີ່ມີຄວາມໂດດເດັ່ນສະເພາະຕົວ. ພ້ອມດຽວກັນນີ້ ພາຍ ໃນງານຍັງມີງານວາງສະແດງສິນຄ້າ ເພື່ອໃຫ້ບັນດານັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາເລືອກຊີ້ສິນຄ້າຂອງລາວ ທີ່ມີຫລາກຫລາຍຮູບແບບ ແລະ ສິນຄ້າຕ່າງ ປະເທດຈຳນວນໜຶ່ງ. ນອກນີ້ ຍັງຈະມີຫລາກຫລາຍກິດຈະກຳ ເປັນຕົ້ນແມ່ນ ການສະແດງສິນລະປະວັນນະຄະດີ, ການປະກວດໝໍລຳກອນ, ລຳຄູ່, ເປົ່າແຄນ ຂຶ້ນໃນວັນທີ 22 ສິງຫາ 2012 , ການປະກວດການປຸງແຕ່ງອາຫານປະເພດຕ່າງໆ ໃນວັນທີ 23 ສິງຫາ 2012 ແລະ ການສະແດງອື່ນໆໃນແຕ່ລະວັນ, ການຈັດງານໃນຄັ້ງນີ້ເປັນຄັ້ງທຳອິດ ຂອງນະຄອນ ຫລວງວຽງຈັນ ຊຶ່ງມີຜູ້ເຂົ້າຮ່ວມທັງໝົດ 161 ຮ້ານ, ໃນນີ້ ມີຫົວໜ່ວຍຄອບຄົວຕົວແບບ 10 ຫົວໜ່ວຍ, ຕົວແທນທຸລະກິດຈາກບັນດາແຂວງຕ່າງໆ 17 ຫົວໜ່ວຍ, ຫົວໜ່ວຍອຸດສະຫະກຳ-ຫັດຖະກຳ 50 ຫົວໜ່ວຍ, ຮ້ານວາງສະແດງ ແລະ ຂາຍສິນຄ້າຈາກຕ່າງປະເທດ 20 ຮ້ານ ແລະ ຮ້ານອາຫານເຂົ້າຮ່ວມເທດສະການອາຫານ 20 ຮ້ານ ລວມມູນຄ່າທັງໝົດປະມານ 3.500.000.000 ກີບ.

ສູນການຄ້າອາຊຽນແຫ່ງນີ້ ໄດ້ເລີ່ມກໍ່ສ້າງໃນປີ 2007 ເປັນຕົ້ນມາ ໂດຍການລົງທຶນຂອງນັກທຸລະກິດພາຍໃນ 100% ແລະ ໄດ້ສຳເລັດໃນເດືອນກໍລະກົດ 2012 ນີ້ ເພື່ອສ້າງ ໃຫ້ເປັນສູນການຄ້າທີ່ທັນສະໄໝ ແລະ ຄົບວົງຈອນອີກແຫ່ງໜຶ່ງ ຂອງນະຄອນຫລວງວຽງຈັນ ເພື່ອຮອງຮັບການມາໃຊ້ບໍລິ ການ-ຄ້າ ຂາຍສິນຄ້າ ຂອງບັນດານັກທຸລະກິດທັງພາຍໃນ ແລະ ຕ່າງປະເທດ ເປັນຕົ້ນແມ່ນ ນັກທຸລະກິດໃນພາກ ພື້ນອາຊີ, ເປັນສະຖານທີ່ທີ່ທັນສະໄໝ ແລະ ມີຄວາມສະດວກສະບາຍ ໃນການບໍລິການທ່ຽວຊົມ, ປະກອບມີ 3 ຊັ້ນ, ມີພື້ນທີ່ສະເລ່ຍ 15.000 ຕາແມັດ, ປະກອບມີຮ້ານຄ້າໃຫ້ເຊົ່າ 300 ຫ້ອງ, ມີຫ້ອງໂຖງໃຫຍ່ສຳລັບງານລ້ຽງ, ງານດອງ, ງານສຳມະນາ ແລະ ງານວາງສະແດງສິນຄ້ານຳອີກ, ສາມາດຈອດລົດໄດ້ເຖິງ 1.000 ຄັນ. ໃນຕໍ່ໜ້າຍັງຈະສ້າງລານຈອກດລົດເປັນ 3 ຊັ້ນ ໃນເນື້ອທີ່ 35.000 ຕາແມັດ ສາມາດບັນຈຸລົດໄດ້ 1.200 ຄັນ, ນອກນັ້ນຍັງມີ ການກໍ່ສ້າງອາຄານວາງສະແດງ ແລະ ຂາຍສິນຄ້າ 3 ຊັ້ນ, ຈຳນວນ 11 ຫລັງ, ມີ 171 ຫ້ອງຕື່ມອີກ./.

ຂໍຂອບໃຈຂ່າວຈາກ http://www.kpl.net.la/

ແກ້ໄຂລ່າສຸດ (ມື້ຈັນທີ່ 20 ສິງຫາ 2012 ເວລາ 04: 59)

 

Add comment


Security code
Refresh