ວາງສືລາລຶກກໍ່ສ້າງ​ບ້ານ​ມິດຕະພາບ​ຊາວ​ໜຸ່ມ​ຊາຍ​ແດນ​ລາວ-ຫວຽດນາມ

(ຂປລ) ເພື່ອເປັນການເສີມຂະຫຍາຍມູນເຊື້ອ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫ່ວາງ ລາວ-ຫວຽດນາມ ທີ່ມີມາແຕ່ດົນນານໃຫ້ນັບມື້ເຂົ້າສູ່ລວງເລີກນັ້ນ ໃນວັນທີ 22 ສິງຫາ 2012 ສູນກາງຊາວໜຸ່ມປະຊາຊົນ ປະຕິວັດລາວ ແລະ ສູນກາງຊາວໜຸ່ມກອມມູນິດໂຮ່ຈິມິງ ໄດ້ຮ່ວມກັນຈັດພິທີວາງສີລາລຶກ ໂຄງການກໍ່ສ້າງບ້ານ ມິດຕະພາບຊາວໜຸ່ມຊາຍແດນລາວ-ຫວຽດນາມ, ຢູ່ທີ່ເຂດກຸ່ມບ້ານໜອງກອກ, ເມືອງຄຳເກີດ, ແຂວງບໍລິຄຳໄຊ, ໂດຍການເຂົ້າຮ່ວມຂອງ ທ່ານ ປ້ານ ນ້ອຍມະນີ, ເຈົ້າແຂວງໆ ບໍລິຄຳໄຊ, ທ່ານ ດຣ ວິໄລວົງ ບຸດດາຄຳ, ເລຂາຄະນະບໍລິຫານງານສູນກາງ ຊປປ ລາວ, ທ່ານ ຟາມວັນໝາຍ ຮອງເລຂາສູນກາງຊາວໜຸ່ມກອມມູນິດໂຮ່ຈິມິງ, ມີບັນດາການນຳພັກ-ລັດຈາກສູນກາງແລະທ້ອງຖິ່ນ, ບັນດາຊາວໜຸ່ມຈາກສູນກາງຊປປລາວ- ຊາວໜຸ່ມກອມມູນິດໂຮ່ຈິມິງ, ພ້ອມດ້ວຍພໍ່ແມ່ປະຊາຊົນໃນກຸ່ມບ້ານດັ່ງກ່າວເຂົ້າຮ່ວມ.

ທ່ານ ສົມສີ ໄຊເສດຕະລາດ ຮອງຫົວໜ້າກົມອົບຮົມຂະບວນການ, ຫົວໜ້າຄະນະຄຸ້ມຄອງໂຄງການໄດ້ກ່າວວ່າ ໂຄງການກໍ່ສ້າງບ້ານມິດຕະພາບຊາວໜຸ່ມຊາຍແດນ ລາວ-ຫວຽດ ນາມ ແມ່ນໂຄງການການຮ່ວມມືລະຫວ່າງສູນກາງຊາວໜຸ່ມ ປປລ ແລະ ສູນກາງຊາວໜຸ່ມກອມມູນິດໂຮ່ຈິມິງເຊິ່ງໄດ້ກາຍເປັນສັນຍາລັກແຫ່ງມິດຕະພາບ ແລະ ການຮ່ວມມື ລະຫວ່າງສອງອົງການຈັດຕັ້ງມະຫາຊົນ ແລະ ເປັນໂຄງການທຳອິດທີ່ເກີດຂຶ້ນພ້ອມກັບການສະເຫລີມສະຫລອງສອງວັນປະຫວັດສາດລາວ-ຫວຽດນາມ ຊຶ່ງໂຄງການດັ່ງກ່າວໄດ້ ແບ່ງອອກເປັນສອງພາກສ່ວນໃຫຍ່ຄື: ພາກທີໜື່ງແມ່ນໂຄງການກໍ່ສ້າງພື້ນຖານໂຄງລ່າງ ແລະ ສວນສາທິດຖ່າຍທອດເຕັກນິກກະສິກຳລວມມີປະຕູໂຂງ, ລະບົບໜອງປາ, ບ່ອນ ລະບາຍນ້ຳ, ເຮືອນພັກ, ສະໂມສອນ, ໂຮງລ້ຽງເດັກອະນຸບານ, ສຸກສາລາ, ເດີ່ນກິລາ, ນ້ຳປະປາ, ລະບົບຊົນລະປະທານ, ບຸກເບີກເນື້ອທີ່ນາ, ສູນກ້າເບ້ຍໃນຮົ່ມ ແລະ ອື່ນໆ. ພາກສ່ວນນີ້ໃຊ້ທຶນຊ່ວຍເຫລືອລ້າຈາກລັດຖະບານຫວຽດນາມຈຳນວນ 65,159 ຕື້ດົງ, ປະຈຸບັນໄດ້ສຳເລັດການອອກແບບ ແລະ ຄິດໄລ່ປະເມີນລາຄາການກໍ່ສ້າງຈຳນວນໜຶ໋ງ, ໂຄງການທີສອງແມ່ນລົງທຶນປູກຢາງພາລາຈຳນວນ 700 ເຮັກຕາ, ປູກແລ້ວ 510 ເຮັກຕາ,ໃນນີ້ທຶນ ຂອງຄະນະຊາວໜຸ່ມ ປປລ ແຂວງບໍລິຄຳໄຊມູນຄ່າການລົງທຶນ 73,622 ຕື້ດົງ, ລວມມູນຄ່າການລົງທຶນທັງສອງພາກ 144, 311 ຕື້ດົງ, ໃນນັ້ນທຶນສົມທົບລັດຖະບານລາວ 5,530 ຕື້ດົງ, ເນື້ອທີ່ຂອງໂຄງການທັງໝົດແມ່ນ 1.034 ເຮັກຕາ, ເນື້ອທີ່ສ້າງ ສູນບ້ານມິດຕະພາບຊາຍແດນຈຳນວນ 12 ເຮັກຕາ, ຄາດວ່າຈະສຳເລັດໃນປີ 2014 ນີ້, ໂຄງການດັ່ງກ່າວຈະເປັນບ່ອນເຕົ້າໂຮມຊາວໜຸ່ມ ແລະ ຄອບຄົວຊາວໜຸ່ມຂອງທ້ອງຖິ່ນ ເຂົ້າປະກອບອາຊີບແບບຍາວນານ, ກໍ່ສ້າງເຂດຊຸມຊົນໃໝ່ທີ່ມີການ ພັດທະນາແບບຍືນຍົງ, ສ້າງອາຊີບ, ນຳໃຊ້ ແລະ ຖ່າຍທອດເຕັກນິກວິທະຍາສາດກະສິກຳ-ປ່າໄມ້ ທີ່ກ້າວໜ້າ, ສ້າງຕົວແບບໃຫ້ຊາວໜຸ່ມ, ປະຊາຊົນໃນທ້ອງຖິ່ນ ແລະ ເຂດ ໃກ້ຄຽງມາສຶກສາຮ່ຳຮຽນ./.

 

ຂໍຂອບໃຈຂ່າວຈາກ http://www.kpl.net.la/

 

Add comment


Security code
Refresh