ນະຄອນຫລວງ​ວຽງ​ຈັນ ​ໄດ້​ຮັບໂລ້​ລາງວັນ ຕົວ​ເມືອງ​ທີ່​ໜ້າ​ຢູ່​ຂອງ​ໂລກ

(ຂປລ): ນະຄອນຫລວງວຽງຈັນ ເປັນ 1 ໃນ 10 ຂອງຈຳນວນ 141 ຕົວເມືອງຂອງໂລກທີ່ໜ້າຢູ່ ເພາະເປັນຕົວເມືອງທີ່ມີການລົງທຶນຕ່ຳ ແຕ່ມີປະສິດທິຜົນສູງ. ໂດຍມີການວັດ ແທກຈາກບັນດາເງື່ອນໄຂຕ່າງໆ ຄື: ການຈົດທະບຽນຊັບສິນ (ເປີເຊັນຂອງມູນຄ່າຊັບສິນ), ມູນຄ່າທີ່ກ່ຽວຂ້ອງກັບການກໍ່ສ້າງ (ເປີເຊັນລາຍໄດ້ຕໍ່ຫົວຄົນ), ກຳໄລຈາກພາສີ, ລາຄາ ໂຮງແຮມ, ອັດຕາຄ່າແຮງງານຕ່ຳສຸດຕໍ່ອາທິດ, ຄ່າເຊົ່າຫ້ອງການສຳນັກງານ, ຄ່າເຊົ່າເຂດອຸດສາຫະກຳ ແລະ ຄວາມອາດສາມາດຂອງກຳລັງ ຄວາມສາມາດຊື້ຂອງຄົນໃນສັງຄົມ ອັດຕາແລກປ່ຽນ. ຈາກເງື່ອນໄຂດັ່ງກ່າວ ນະຄອນຫລວງວຽງຈັນ ຈຶ່ງຖືກຈັດຢູ່ໃນອັນດັບທີ 6 ເປັນເມືອງໜ້າຢູ່ຂອງບັນດາຕົວເມືອງໃນຂົງເຂດອາຊີ-ປາຊີຟິກ ຍ້ອນເປັນເມືອງທີ່ມີ ປະສິດທິຜົນດ້ານການລົງທຶນ.

ບັນດານະຄອນ ທີ່ຖືກຄັດເລືອກເຂົ້າຮ່ວມການແຂ່ງຂັນ ໃນຫົວຂໍ້ “ການຈັດອັນດັບຕົວເມືອງແຫ່ງອະນາຄົດ“ ແມ່ນເກັບກຳຈາກບັນດານະຄອນໃນຂົງເຂດອາຊີ-ປາຊີຟິກ ຈຳນວນ 141 ຕົວເມືອງ ແລະ ແບ່ງການປະເມີນຜົນເປັນ 6 ປະເພດຕົວເມືອງ ຄື: ຄວາມອາດສາມາດຂອງເສດຖະກິດ, ຊັບພະຍາກອນມະນຸດ, ມູນຄ່າປະສິດທິຜົນ, ຄຸນະພາບການດຳລົງຊີວິດ, ຄວາມເປັນມິດໃນການລົງທຶນ ແລະ ການສົ່ງເສີມຍຸດທະສາດການ ລົງທຶນຕ່າງປະເທດ. ຈາກການປະເທີນຜົນ ຕາມເງື່ອນໄຂທີ່ກ່າວມານັ້ນ ຈຶ່ງສາມາດຈັດລຽງ 10 ອັນດັບ ສູງສຸດດັ່ງນີ້: 1. ສິງກະໂປ ປະເທດສິງກະໂປ; 2 . ຊຽງໄຮ ສປ ຈີນ; 3. ໂຊລ ປະເທດ ສ ເກົາຫລີ, 4. ເຊັນເຊັນ, 5. ໄຕຫວັນ, 6. ຮົງກົງ, 7. ປັກກິ່ງ ສປ ຈີນ; 8. ແມວເບີນ ອົດສຕຣາລີ; 9. ໂຕກຽວ ປະເທດຍີ່ປຸ່ນ; 10. ຊິດນີ ອົດສຕຣາລີ.

ສຳລັບ ນະຄອນຫລວງວຽງຈັນ ແມ່ນຖືກຈັດຢູ່ໃນອັນດັບທີ 6 ເພາະເປັນຕົວເມືອງທີ່ມີການລົງທຶນຕ່ຳ ແຕ່ມີປະສິດທິຜົນສູງ ຊຶ່ງມີລາຍລະອຽດດັ່ງນີ້: 1. ພະນົມເປັນ ກຳປູເຈຍ; 2. ຮາຍຟອງ, 3. ດານັງ ສສ ຫວຽດ ນາມ; 4. ໂຈໂຮ ບາຣູ ມາເລເຊຍ; 5. ຮ່າໂນ້ຍ ສສ ຫວຽດນາມ; 6. ວຽງຈັນ ສປປ ລາວ; 7. ກັດມັນດູ ເນປານ; 8. ມູນຖານ ປາ ກິສຖານ; 9. ອາໂລ ເຊຕາ ມາເລເຊຍ ແລະ 10. ຣະຍອງ ປະເທດໄທ.

ຂໍ້ມູນດັ່ງກ່າວ ໄດ້ຮັບການລາຍງານ ໃນງານໂຮມຊຸມນຸມສະເຫລີມສະຫລອງ ວັນຢຶດອຳນາດຂອງຊາວນະຄອນຫລວງວຽງຈັນ ຄົບຮອບ 37 ປີ (23/08/1975-23/08/2012) ໃນວັນທີ 23 ສິງຫາ 2012 ທີ່ຫໍວັດທະນະທຳແຫ່ງຊາດ, ນະຄອນຫລວງວຽງຈັນ./.

 

ຂໍຂອບໃຈຂ່າວຈາກ http://www.kpl.net.la/

 

Add comment


Security code
Refresh