ທ່ານ ຮອງນາຍົກລັດຖະມົນຕີກວດກາວັດຖຸບູຮານ ເຄື່ອງປັ້ນດິນເຜົາ ເກົ່າແກ່ ອາຍຸ 400 ກວ່າປີ

(ຂປລ): ໃນວັນທີ 29 ສິງຫາ 2012 ນີ້ ທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະ ມົນຕີໄດ້ລົງຢ້ຽມຢາມ ແລະ ກວດກາເບິ່ງວັດຖຸບຸຮານ ເຄື່ອງປັ້ນດິນເຜົາເກົ່າ ແກ່ສະໄໝລ້ານຊ້າງຄາດວ່າມີອາຍຸ 400 ກວ່າປີທີ່ກອງວັດຖຸບູຮານ, ກົມມໍລະດົກ, ກະຊວງ ຖວທ ຄົ້ນພົບໃນເຂດກໍ່ສ້າງອາຄານແຫ່ງໃໝ່ ຂອງຫ້ອງການຜູ້ຕາງໜ້າທະນາຄານໂລກ ປະຈຳ ສປປ ລາວ ທີ່ບ້ານຊຽງຍືນ ເມືອງຈັນທະບູລີ, ນະຄອນ ຫລວງວຽງຈັນ.

ທ່ານ ວຽງແກ້ວ ສຸກສະຫວັດດີ, ຮອງຫົວໜ້າກົມມໍລະດົກ. ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ເປີດເຜີຍຕໍ່ທ່ານ ຮອງນາຍົກລັດຖະມົນຕີວ່າ: ພາຍຫລັງ ກອງບູຮານ ວິທະຍາ, ກົມມໍລະດົກ ໄດ້ນຳທິມງານລົງຕິດຕາມ ສຳຫລວດເບີ່ງພື້ນທີ່ໂຄງການກໍ່ສ້າງແລ້ວຕໍ່ມາກໍໄດ້ຄົ້ນພົບວັດຖຸບູຮານຈຳນວນ ໜຶ່ງໃນສະຖານທີ່ກໍ່ສ້າງດັ່ງກ່າວ ໃນວັນທີ 15 ສິງຫາ 2012 ມີຄື: ກຳແພງແກ້ວ ເມືອງເກົ່າ, ແຖ່ນພຣະພຸດທະຮູບ, ຖ້ວຍ, ໄຫ, ກອກຢາສູບ. ປະຈຸບັນການສຳຫລວດຍັງຈະໄດ້ດຳເນີນ ຕໍ່ໄປຈົນກວ່າຈະສຳເລັດ ແລະ ຄາດວ່າຈະພົບເຫັນວັດຖຸບຮານອື່ນໆອີກໃນມື້ໜ້າ. ສ່ວນວັດຖຸທີຄົ້ນພົບໃນຄັ້ງນີ້ແມ່ນຈະນຳໄປວິເຄາະ ວິໄຈຢູ່ຫ້ອງການກອງບູຮານວິທະຍາ, ກົມມໍລະດົກ (ຫລັກ 3) ແລ້ວຈະນຳໄປ ເກັບຮັກ ສາ ແລະ ວາງສະແດງ ຢູ່ທີ່ຫໍພິພິດຕະພັນແຫ່ງຊາດ./.

 

ຂໍຂອບໃຈຂ່າວຈາກ http://www.kpl.net.la/

 

 

Add comment


Security code
Refresh