1 ປີ ສະມາຄົມການສຶກສາພາກເອກະຊົນ ແຂວງພາກໃຕ້ ປຸກລະດົມສະມາຊິກໄດ້ 60 %

*(ຂປລ) ໃນໄລຍະ 1 ປີ ຜ່ານມາ, ສະມາຄົມການສຶກສາພາກເອກະຊົນ 4 ແຂວງພາກໃຕ້, ພ້ອມກັນຈັດຕັ້ງປະຕິບັດວຽກງານວິຊາສະເພາະຂອງຕົນໄດ້ຢ່າງຕັ້ງໜ້າ. ໃນນັ້ນ ວຽກງານຂົນຂວາຍ ເຂົ້າເປັນສະມາຊິກຂອງສະມາຄົມການສຶກສາພາກເອກະຊົນ ໄດ້ທັງໝົດ 14 ແຫ່ງ ກວມ 60 %, ຊຶ່ງປະກອບມີ ສະມາຊິກຈາກ ວິທະຍາໄລ 4 ແຫ່ງ, ໂຮງຮຽນປະຖົມ-ມັດທະຍົມສົມບູນ 5 ແຫ່ງ, ໂຮງຮຽນອະນຸບານ-ລ້ຽງເດັກ 3 ແຫ່ງ ແລະ ຈາກສູນອົບຮົມວິຊາຊີບ 2 ແຫ່ງ.

ຕາມການລາຍງານ ໃນກອງປະຊຸມໃຫຍ່ສາມັນປະຈຳປີ 2012 ທີ່ນະຄອນຫລວງວຽງຈັນ ຂອງສະມາຄົມການສຶກສາພາກເອກະຊົນ 27 ສິງຫາ 2012 ຜ່ານມາ ຂອງທ່ານ ຄຳແຝງ ພອນສະຫວັນ, ຜູ້ຕາງໜ້າສະມາຄົມການສຶກສາພາກເອກະຊົນ 4 ແຂວງພາກໃຕ້ໃຫ້ຮູ້ວ່າ: ສະມາຄົມການສຶກສາພາກ ເອກະຊົນ 4 ແຂວງພາກໃຕ້ ມີການເຄື່ອນໄຫວເຮັດກິດ ຈະກຳຮ່ວມກັບສະຖາບັນການສຶກສາພາກລັດຢ່າງຕໍ່ເນື່ອງ, ຊຶ່ງໄດ້ສະແດງອອກຄື: ເຂົ້າຮ່ວມສະຫລຸບສົກຮຽນປີ 2011-2012 ຂອງພະແນກສຶກສາທິການ ແລະ ກິລາແຂວງ ຈຳປາສັກ ແລະ ໄດ້ຄັດເລືອກເອົາໂຮງຮຽນ 3 ແຫ່ງເປັນໂຮງຮຽນດີເດັ່ນຮອບດ້ານທີ 1 ໃນນັ້ນແມ່ນໂຮງຮຽນອະນຸບານ-ປະຖົມສົມບູນແສງອາລຸນ, ໂຮງຮຽນປະຖົມສົມບູນ ມິດຕະພາບ ແລະ ອະນຸບານທິບພະເນດ. ພ້ອມກັນນັ້ນໂຮງຮຽນ ອະນຸບານ-ປະຖົມສົມບູນແສງອາລຸນ ຍັງສົ່ງນັກຮຽນຊັ້ນ ປ 5 ເຂົ້າຮ່ວມສອບເສັ່ງນັກຮຽນເກັ່ງໃນສາຍວິຊາ ພາສາລາວ ແລະ ສາມາດຍາດໄດ້ອັນດັບທີ 3 ໃນຂອບເຂດທົ່ວປະເທດ. ນອກຈາກນີ້ ສະມາຄົມການສຶກສາພາກເອກະຊົນ 4 ແຂວງພາກໃຕ້ ຍັງໄດ້ຮ່ວມກັບພະແນກສຶກສາ ທິການ ແລະ ກິລາແຂວງ ຄັດເລືອກສະຖາບັນ ການສຶກສາທີ່ມີສ່ວນຮ່ວມ ໃນການພັດທະນາຊັບພະຍາກອນມະນຸດ, ຊ່ວຍເຫລືອສັງຄົມເພື່ອຮັບໂລ້ກຽດຕິຄຸນເນື່ອງໃນໂອກາດ ວັນ ຄົບ ຮອບການສ້າງຕັ້ງສະມາຄົມການສຶກສາພາກເອກະຊົນ ຄົບຮອບ 10 ປີ.

ສຳລັບທິດທາງແຜນການໃນຕໍ່ໜ້າ ສະມາຄົມການສຶກສາພາກເອກະຊົນ 4 ແຂວງພາກໃຕ້ ຈະໄດ້ມີການປຶກສາຫາລື ແລະ ສະເໜີຕໍ່ອຳນາດການປົກຄອງແຂວງເປັນຕົ້ນ ວິທີການ ຂະຫຍາຍສະມາຊິກເຂົ້າ ໃນສະມາຄົມໃຫ້ກວ້າງຂວາງເພີ່ມຂຶ້ນ ແລະ ຄາດໝາຍໃຫ້ສຳເລັດ 100 % ພາຍໃນປີ 2012; ສ້າງເງື່ອນໄຂຫລືເຄື່ອງມືໃນການເຄື່ອນໄຫວຂອງສະມາ ຄົມໃຫ້ມີຄວາມສະດວກຍິ່ງຂຶ້ນ ໂດຍສະເພາະຈັດ ຫາທີ່ຕັ້ງຫ້ອງການ, ຊອກຫາພະນັກງານບໍລິຫານປະຈຳສະມາຄົມການສຶກສາພາກເອກະຊົນ ຢ່າງໜ້ອຍໃຫ້ມີ 1 ຫາ 2 ຄົນ ແລະ ຈັດງານສັງສັນສະຫລຸບຜົນງານເພື່ອຊອກແຫລ່ງລາຍຮັບເພື່ອຮັບໃຊ້ວຽກງານພາຍໃນໃຫ້ເປັນປົກກະຕິ ແລະ ອື່ນໆ./.

 

ຂໍຂອບໃຈຂ່າວຈາກ http://www.kpl.net.la/

ແກ້ໄຂລ່າສຸດ (ມື້ພະຫັດທີ່ 30 ສິງຫາ 2012 ເວລາ 09: 32)

 

Add comment


Security code
Refresh