ທີ​ມບານ​ເຕະ​ຍິງ​ລາວ ​ໄດ້​ອັນ​ດັບ​ທີ 4 ໃນ​ເຕະບານ ຊີງ​ແຊ໋ມ ອາ​ຊຽນ 2012 ທີ່ ຮ່າ​ໂນ້ຍ

ທີມບານເຕະຊາດລາວ ເພດຍິງ ເຮັດໄດ້ດີດ້ວຍການຍາດໄດ້ອັນດັບທີ 4 ມາຄອງ, ສ່ວນອັນດັບທີ 1 ຕົກເປັນຂອງເຈົ້າພາບ ຫວຽດນາມ ໃນການແຂ່ງຂັນເຕະບານຍິງ ຊີງແຊ໋ມ ອາຊຽນ 2012 ທີ່ ຮ່າໂນ້ຍ

ການແຂ່ງຂັນເຕະບານ ຊີງແຊ໋ມ ອາຊຽນ 2012 ໄດ້ເລີ່ມຂຶ້ນໃນວັນທີ 13 ກັນຍາ ແລະ ສຳເລັດລົງ ໃນວັນທີ 22 ກັນຍາ ຜ່ານມາທີ່ນະຄອນຫລວງ ຮ່າໂນ້ຍ ສສ ຫວຽດນາມ ເຊິ່ງມີທີມເຂົ້າຮ່ວມທັງໝົດ 7 ທີມ ແບ່ງອອກເປັນ 2 ກຸ່ມ ຄື: ກຸ່ມ A ປະກອບມີ ຫວຽດນາມ ເຈົ້າພາບ, ມຽນມາ, ຟິລິບປິນ ແລະ ສິງກະໂປ, ສ່ວນ ກຸ່ມ B ປະກອບມີ ລາວ, ໄທ ແລະ ມາເລເຊຍ. ຜ່ານການແຂ່ງຂັນທີມຊາດລາວສາມາດເຂົ້າເຖິງຮອບ 4 ທີມ ເຊິ່ງເສຍໃຫ້ ທີມ ເຈົ້າພາບ 0-7 ຈຶ່ງໄດ້ມາຊີງທີ 3 ກັບ ທີມຊາດໄທ ທີ່ເຄີຍເອົາຊະນະ ທີມລາວ ໃນຮອບຄັດເລືອກ 3-0 ແລະ ທີມ ໄທ (ທີ່ເສຍໃຫ້ ທີມ ມຽນມາ 0-1) ເຊິ່ງມາໃນນັດນີ້ ທີມລາວ ສູ້ສຸດຂີດ ແຕ່ບໍ່ອາດຕ້ານທານ ທີມໄທ ໄດ້ຈຶ່ງເສຍດ້ວຍຄະແນນ 1-14 ສົ່ງຜົນໃຫ້ ທີມຊາດລາວ ໄດ້ອັນດັບທີ 4 ມາຄອງ, ສ່ວນອັນດັບທີ 3 ຕົກເປັນຂອງ ທີມໄທ, ສຳລັບ ອັນດັບທີ 1 ຕົກເປັນຂອງ ທີມ ຫວຽດນາມ ທີ່ເອົາຊະນະທີມມຽນມາ 4-3 ຈາກການຍິງລູກໂທດ ຫລັງຈາກສະເໝີກັນ 0-0 ໃນໄລຍະ 90 ນາທີ, ສ່ວນອັນດັບທີ 2 ແມ່ນເປັນຂອງ ທີມ ມຽນມາ

ໃນໂອກາດນີ້ ທ່ານ ໄຊບັນດິດ ຣາຊະພົນ ເລຂາທິການ ສະຫະພັນບານເຕະແຫ່ງຊາດ ໄດ້ໃຫ້ສຳພາດວ່າ: ຕໍ່ຜົນງານທີ່ ນັກກິລາບານເຕະຍິງລາວ ຍາດໄດ້ອັນດັບທີ 4 ມາຄອງ ຖືໄດ້ວ່າ ບັນລຸຕາມເປົ້າໝາຍທີ່ຕັ້ງໄວ້ໃນເບື້ອງຕົ້ນ, ທັງນີ້ ກໍເນື່ອງຈາກ ການປະເມີນທີມຂອງຄູ່ແຂ່ງ ໂດຍສະເພາະທີມເຈົ້າພາບຫວຽດນາມ, ໄທ, ມຽນມາ ຕະຫລອດຮອດ ທີມມາເລເຊຍ ລ້ວນແຕ່ເປັນທີມທີ່ແຂງແກ່ນ ມີນັກກິລາປະສົບການສູງ ແລະ ມີຄວາມແຂງແກ່ນທາງດ້ານ ພະລະກຳລັງ ກໍຄືທັກສະໃນການຫລິ້ນບານ... ສ່ວນທີມເຮົາ ໃນຊຸດນີ້ ເປັນນັກກິລາ ໜ້າໃໝ່ ແລະ ມີອາຍຸນ້ອຍ ລະຫວ່າງ 17-19 ປີ ສ່ວນຫລາຍບໍ່ເຄີຍອອກໄປແຂ່ງຂັນຢູ່ຕ່າງປະເທດຈັກຄັ້ງ, ສຳລັບນັກກິລາທີ່ເຄີຍຜ່ານການແຂ່ງເຊັ່ນນີ້ ແລະ ເປັນນັກກິລາໂຕ ຫລັກຂອງທີມ ບໍ່ອາດເດີນທາງໄປຮ່ວມແຂ່ງຂັນໄດ້ ເພາະມີອາການບາດເຈັບ, ພ້ອມນີ້ ນັກກິລາທີ່ເກັ່ງຈຳນວນໜຶ່ງ ກໍໄດ້ເຊົາຫລິ້ນບານເຕະແລ້ວ. ເຖິງແນວໃດ ກໍດີ ພາຍຫລັງທີ່ ນັກກິລາຊຸດນີ້ ກັບຄືນມາບ້ານແລ້ວ ຄູຝຶກ ສປປ ເກົາຫລີ ຈະສືບຕໍ່ຝຶກຊ້ອມຢ່າງໜັກໃຫ້ແກ່ເຂົາເຈົ້າ ເພື່ອສ້າງຄວາມເຂັ້ມແຂງຮອງຮັບການເປັນເຈົ້າພາບ ມະຫະກຳກິລາ ມະຫາ ວິທະຍາໄລ ອາຊຽນ ຄັ້ງທີ XVI ທີ່ ສປປ ລາວ ຈະເປັນເຈົ້າພາບ ໃນທ້າຍປີ 2012 ນີ້

ຂໍຂອບໃຈຂ່າວຈາກ http://www.kpl.net.la



 

Add comment


Security code
Refresh