ສະ​ຫະພັນ​ມວຍ​ລາວ ໄດ້ຮັບການ​ຍອມຮັບ​ຈາກ​ສາກົນ

*ຍ້ອນຜົນງານຂອງສະຫະພັນມວຍ ແຫ່ງຊາດລາວ ໂດດເດັ່ນໃນລະດັບພາກພື້ນກໍຄືສາກົນ ຈຶ່ງເຮັດໃຫ້ປະທານສະຫະພັນມວຍແຫ່ງຊາດລາວ ໄດ້ຮັບການແຕ່ງຕັ້ງເປັນປະທານ ສະຫະພັນມວຍອາຊີ, ຄວບຕຳແໜ່ງປະທານສະຫະພັນມວຍອາຊຽນ ແລະ ຮັບຮອງເອົາກິລາມວຍລາວ ເຂົ້າເປັນສະມາຊິກ ສະຫະພັນ ສິລະປະຕໍ່ສູ້ປ້ອງກັນຕົວໂລກ ອັນຈະເຮັດ ໃຫ້ນັກມວຍລາວ ມີທ່າໄດ້ຫລຽນໃນມະຫະກຳ ກິລາມະຫາວິທະຍາໄລອາຊຽນຄັ້ງທີ XVI ທີ່ ສປປ ລາວ ຈະເປັນເຈົ້າພາບ ທ້າຍປີນີ້ ເຊິ່ງຢ່າງໜ້ອຍ 4 ຫລຽນຄຳ.

ທ່ານ ສາຍສະໝອນ ໄຊຍະສອນ ປະທານສະຫະພັນມວຍອາຊີ, ປະທານສະຫະພັນມວຍອາຊຽນ,ປະທານສະຫະພັນມວຍແຫ່ງຊາດລາວ ໃຫ້ສຳພາດໃນ ວັນທີ 17 ກັນຍານີ້ວ່າ: 3 ເດືອນຜ່ານມາ, ສະຫະພັນມວຍແຫ່ງຊາດລາວ ໄດ້ກະກຽມປະຫວັດຄວາມເປັນມາຂອງມວຍລາວທີ່ມີມາແຕ່ກ່ອນປົດປ່ອຍປະເທດຊາດ ແລະ ພາຍຫລັງ ໄດ້ສ້າງຕັ້ງສະຫະພັນ ມວຍແຫ່ງຊາດລາວໃນປີ 2004. ຂະນະທີ່ວັນທີ 9-14 ກັນຍາ, ຕົນໄດ້ເຂົ້າຮ່ວມກອງປະຊຸມ ເພື່ອ ຍົກໃຫ້ເຫັນບົດບາດຂອງແຕ່ລະປະເທດ ໂດຍໄດ້ປຶກສາຫາລືການນຳເອົາກິລາ ມວຍລາວເຂົ້າເປັນສະມາຊິກສະຫະພັນ ກິລາສິລະປະຕໍ່ສູ້ປ້ອງກັນໂຕໂລກ. ຜ່ານການສະເໜີຜົນງານຈຶ່ງໄດ້ຮັບການຍອມຮັບຈາກ 39 ປະເທດທີ່ເປັນ ສະມາຊິກໃຫ້ເຂົ້າເປັນສະ ມາຊິກສະຫະພັນສິລະປະຕໍ່ສູ້ປ້ອງກັນໂຕໂລກ. ພ້ອມດຽວກັນລາວເຮົາກໍໄດ້ຮັບໃບຢັ້ງຢືນ ພ້ອມທຸງຮອງຮັບການເຂົ້າເປັນສະມາຊິກ.

ທ່ານ ສາຍສະໝອນ ກ່າວຕື່ມວ່າ:ການໄດ້ເປັນປະທານມວຍ ອາຊີ ແລະ ອາຊຽນ ກໍຄືເປັນສະມາຊິກ ສະຫະພັນສິລະປະຕໍ່ສູ້ປ້ອງກັນຕົວໂລກ ມີດີຫລາຍຢ່າງ ອັນຕົ້ນຕໍກໍຄືເຮັດ ໃຫ້ສາກົນຮັບຮູ້ຄວາມສາມາດຂອງນັກມວຍລາວ, ມີໂອກາດໄດ້ຮັບການຊຸກຍູ້ ແລະ ຍົກລະດັບເພື່ອພັດທະນາກິລາມວຍລາວໃຫ້ກ້າວໜ້າທຽບເທົ່າສາກົນ. ພິເສດ ໂອກາດໄດ້ ຫລຽນໃນການແຂ່ງຂັນລະດັບພາກພື້ນ ແລະ ສາກົນ ມີຫລາຍເນື່ອງຈາກເຮົາມີສິດຈັບຄູ່ມວຍລວມເຖິງການໃຫ້ຄະແນນ ຂອງກຳມະການເຊິ່ງສະແດງອອກໃນການແຂ່ງຂັນມວຍ ຊີເກມ ຄັ້ງທີ 25 ໃນປີ 2009 ທີ່ ສປປ ລາວ ເປັນເຈົ້າພາບຜ່ານມາ ແລະ ເປັນປະຫວັດສາດຂອງວົງການມວຍລາວທີ່ 9 ຄົນສົ່ງເຂົ້າຮ່ວມ ໄດ້ 5 ຫລຽນຄຳ, 3 ຫລຽນເງິນ ແລະ 1 ຫລຽນທອງ, ສ່ວນການແຂ່ງຂັນກິລາມະຫາວິທະຍາໄລອາຊຽນ ຄັ້ງທີ XVI ທີ່ຈະເຖິງນີ້ຮັບປະ ກັນໃຫ້ໄດ້ 4 ຫລຽນຄຳ ເປັນຢ່າງໜ້ອຍເພາະເໝັ້ນໃຈຕໍ່ນັກມວຍ ແລະ ມີທ່າແຮງຫລາຍດ້ານ.

ຂໍຂອບໃຈຂ່າວຈາກ http://www.kpl.net.la

 

Add comment


Security code
Refresh