ລາວ​ຈະໄດ້​​ເຂົ້າ​ເປັນ​ສະມາ​ຊິກ ອົງການ​ການ​ຄ້າ​ໂລກ​​ໃນ​ທ້າຍ​ປີ​ນີ້

 

(ຂປລ): ການເຂົ້າເປັນສະມາຊິກອົງການການຄ້າໂລກ (ອຄລ) ຂອງ ສປປ ລາວ ຈະເປັນບາດກ້າວສຳຄັນ ໃນການຍົກລະດັບການຄຸ້ມຄອງດ້ານການຄ້າຂອງຕົນ ໃຫ້ໄດ້ຕາມລະດັບ ສາກົນເທື່ອລະກ້າວ ໂດຍນຳໃຊ້ກົດກະຕິກາຂອງ ອຄລ ສ້າງລະບົບທີ່ເອື້ອອຳນວຍແກ່ການດຳເນີນທຸລະກິດ ບໍ່ມີການຈຳແນກປະຕິບັດ ຮັບປະກັນການແຂ່ງຂັນທີ່ເປັນທຳ, ບໍ່ເອົາ ລັດເອົາປຽບ, ພ້ອມທັງມີຄວາມໂປ່ງໃສ ສາມາດຄາດຄະເນໄດ້ຕໍ່ພາກທຸລະກິດ ເປັນປັດໄຈສຳຄັນໃນການສ້າງຄວາມເຊື່ອໝັ້ນໃຫ້ແກ່ນັກລົງທຶນຕ່າງໆ ທີ່ເປັນມືອາຊີບ ເຂົ້າມາລົງ ທຶນພາຍໃນປະເທດຫລາຂຶ້ນ ເຮັດໃຫ້ກຳລັງການຜະລິດເພີ່ມຂຶ້ນ, ວັດຖຸດິບພາຍໃນກໍຈະຖືກນຳໃຊ້ຢ່າງມີປະສິດທິຜົນ ແລະ ພັດທະນາໄປໃນທາງທີ່ຍືນຍົງ, ອີງຕາມການລາຍງານຂອງ ທ່ານ ດຣ ນາມ ວິຍະເກດ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ທີ່ກອງປະຊຸມໜ່ວຍປະຕິບັດງານຄັ້ງທີ 10 ທີ່ໄດ້ຈັດຂຶ້ນທີ່ເຈນີວາ, ປະເທດສະວິດເຊີແລນ ໃນວັນທີ 28 ກັນຍາ 2012 ເຊິ່ງກອງປະຊຸມດັ່ງກ່າວ ຖືເປັນຄັ້ງສຸດທ້າຍຂອງການເຈລະຈາ ໂດຍໄດ້ຈັດຂຶ້ນເພື່ອພິຈາລະນາຮັບຮອງເອົາຜົນສະຫລຸບກ່ຽວກັບການເຂົ້າເປັນສະມາຊິກ ອຄລ ຂອງລາວ, ໂດຍມີສະມາຊິກ ອຄລ ລວມທັງ ສປຈີນ ໃນນາມປະທານກອງປະຊຸມ, ກຸ່ມອາຊຽນ, ກຸ່ມປະເທດດ້ອຍພັດທະນາ ແລະ ສະມາຊິກອື່ນໆ ລ້ວນແຕ່ໄດ້ກ່າວສະແດງຄວາມຍິນດີ ແລະ ຊົມເຊີຍການກະກຽມຢ່າງຕັ້ງໜ້າຂອງລັດຖະບານລາວ. ຜົນສຳເລັດດ້ານປະຫວັດສາດຄັ້ງນີ້ ແມ່ນໝາກຜົນແຫ່ງຄວາມພະຍາຍາມ ແລະ ເອົາໃຈໃສ່ຂອງພັກ ແລະ ລັດຖະບານລາວ ໃນການກະກຽມພື້ນຖານ ແລະ ຄວາມພ້ອມນັບແຕ່ມື້ສະໝັກເຂົ້າເປັນສະມາຊິກ ອຄລ ໃນປີ 1997 ເປັນຕົ້ນມາ.

ທ່ານ ດຣ ນາມ ວິຍະເກດ ກ່າວວ່າ: ສປປ ລາວ ໄດ້ໝູນໃຊ້ຂັ້ນຕອນການເຈລະຈາເຂົ້າເປັນສະມາຊິກ ອຄລ ເປັນແຮງຍູ້ດັນໃຫ້ແກ່ການປັບປຸງກົນໄກຄຸ້ມຄອງດ້ານການຄ້າ ການລົງທຶນຂອງຕົນ ໃຫ້ສອດຄ່ອງກັບລະບຽບຂອງສາກົນ, ທັງເປັນການປູພື້ນຖານໃຫ້ແກ່ ສປປ ລາວ ໃນການເຊື່ອມໂຍງເສດຖະກິດເຂົ້າພາກພື້ນ ແລະ ສາກົນຢ່າງຕັ້ງໜ້າ ໂດຍສະ ເພາະການເຂົ້າຮ່ວມປະຊາຄົມເສດຖະກິດອາຊຽນ ພາຍໃນປີ 2015.

ທ່ານ ລັດຖະມົນຕີ ໄດ້ມີຄຳເຫັນຕໍ່ກອງປະຊຸມ ໂດຍມີບາງຕອນສຳຄັນດັ່ງນີ້: ຕະຫຼອດໄລຍະ 14 ປີ ຂອງການກະກຽມນັບແຕ່ປີ 1997 ສປປລາວ ໄດ້ມີການປັບປຸງ ແລະ ອອກ ລະບຽບກົດໝາຍຫຼາຍກວ່າ 90 ສະບັບ ເພື່ອໃຫ້ສອດຄ່ອງກັບສິນຄ້າຂອງອົງການຄ້າໂລກ ພ້ອມກັບໃຫ້ຄຳໝັ້ນສັນຍາໃນການເປີດຕະຫຼາດ ທັງດ້ານການຄ້າ ແລະ ການບໍລິການ.

ເພື່ອສຳເລັດຂັ້ນຕອນການເຂົ້າເປັນສະມາຊິກ ອຄລ ໂດຍສົມບູນ, ເອກະສານເງື່ອນໄຂການເຂົ້າເປັນສະມາຊິກ ຈະໄດ້ຍື່ນສະເໜີຕໍ່ສະພາໃຫຍ່ຂອງ ອຄລ ທີ່ໄດ້ກຳນົດວ່າຈະຈັດ ກອງປະຊຸມຂັ້ນສູງຮັບຮອງເອົາເອກະສານເງື່ອນໄຂການເຂົ້າເປັນສະມາຊິກດັ່ງກ່າວ ຢ່າງເປັນທາງການ ພາຍໃນທ້າຍເດືອນຕຸລານີ້. ຖືວ່າ ສປປ ລາວ ສາມາດສະຫລຸບການເຈລະ ຈາເຂົ້າເປັນສະມາຊິກ ກ່ອນທີ່ຈະມີການຈັດກອງປະຊຸມອາຊີ-ເອີຣົບ ຄັ້ງທີ 9 ທີ່ ສປປ ລາວ ເປັນເຈົ້າພາບຈັດ ໃນຕົ້ນເດືອນພະຈິກ 2012 ນີ້. ພາຍຫລັງທີ່ເອກະສານເງື່ອນໄຂ ການເຂົ້າເປັນສະມາຊິກ ໄດ້ຖືກຮັບຮ້ອງຢ່າງເປັນທາງການແລ້ວ, ລັດຖະບານ ຈະສະເໜີໃຫ້ສະພາແຫ່ງຊາດ ໃຫ້ສັດຕະຍາບັນ ແລ້ວຈິ່ງແຈ້ງໃຫ້ກອງເລຂາອົງການການຄ້າໂລກ ຮັບຊາບ. ຫລັງຈາກນັ້ນ 30 ວັນ ສປປລາວ ຈະໄດ້ເຂົ້າເປັນສະມາຊິກສົມບູນຂອງອົງການການຄ້າໂລກແບບອັດຕະໂນມັດ.

ຂໍຂອບໃຈຂ່າວຈາກ http://www.kpl.net.la


 

Add comment


Security code
Refresh